Барзу Бобоев, собиқ корманди Вазорати корҳои дохилӣ пас аз муроҷиати видеоӣ дар шабакаҳои иҷтимоӣ ва нашри он дар Azda TV ба ВКД даъват ва бозпурсӣ шудааст.
Ҳафтаи гузашта Azda TV хабареро нашр кард, ки дар он аз муроҷиати як ҷавони тоҷик Барзу Бобоев сокини шаҳри Душанбе ба Эмомалӣ Раҳмон ва писараш Рустами Эмомалӣ гуфта мешуд. Ба нақли ин ҷавон, масъулони Вазорати корҳои дохилӣ дар вилояти Хатлон ба хотири вазни зиёдаш ӯро аз кор рондаанд.
Барзу мегӯяд, Донишкадаи ҳуқуқии Вазорати корҳои дохилии Русияро дар шаҳри Белград хатм кардааст. Ӯ пас аз хатми Донишкада ба Ватан баргашта, дар Сарраёсати хадамоти давлатии оташнишонии Вазорати корҳои дохилии Тоҷикистон корро оғоз кардааст. Аммо, ба нақли худаш, ӯро моҳи июли соли 2024 ба сабаби “гаронвазнияш” аз мақомоти корҳои дохилӣ озод карданд.”
“Азия-Ппюс” бино ба суҳбате, ки бо Бобоев дошта, менависад, ки ин собиқ корманди Сарраёсати хадамоти оташнишонии ВКД пас аз он ки дар соли 2024 аз кор ихроҷ шуд, то ҳол кори муносиб надоштааст ва муроҷиатҳояш ба ин Вазорат бе натиҷа будаанд. Танҳо пас аз муроҷиати оммавияш дар фазои маҷозӣ, ки Azda TV низ онро пӯшиш дода буд, ӯро дубора ба вазорат даъват намуда, бо ӯ суҳбат кардаанд.
Бобоев дар идомаи суҳбатҳояш бо ин расона гуфтааст, ки соли гузашта дар саҳни Вазорати корҳои дохилӣ тамоми “гаронвазнҳоро” ҷамъ кардаанд ва вазири корҳои дохили Рамазон Раҳимзода ба шаройиташ нигариста, ӯро аз вазифа озод кардааст ва баъд аз як моҳ номаи вазир омадааст, ки дар он Барзу Бобоев аз мақомот ронда шудааст.
Номбурда эътироф мекунад, ки дар он ҳангом вазнаш 125 кг буд, вале ба ӯ муҳлат надодаанд то вазни худро кам кунад.
Ҳоло ӯ бо тамрин кардан вазни худро ба 105 кг расонидааст. Дар суҳбати ахираш бо РВКД ба ӯ гуфтаанд, ки 6-10 кг дигар вазн фарорад ӯро ба кор қабул мекунанд.
Дар ҳамин ҳол Нусратулло Маҳмадзода, сухангӯи ВКД мегӯяд, тибқи стандардҳо кормандон бояд аз лиҳози қад ва вазн шароити лозимро дошта бошанд. Қад барои мардон ҳадди ақал 168 см ва барои занҳо 160 см мебошад. Вазни афрод бояд бо қад ва сину солашон мутобиқат дошта бошад.
“Кормандони “гаронвазн” барои ширкат дар чорабиниҳои давлатӣ ва байналмилалӣ мутобиқат намекунанд. Аз ҳисоби он ки либос шинам нест, симои зоҳирӣ хуб нест, чустучолок нестанд ва ғайра. Симои зоҳирии онҳо аз тарзи солим ё носолим зистанашон хабар медиҳад ва ин тасмим барои ташвиқи онҳо ба варзиш гирифта шудааст.” – омадааст дар изҳорот сухангӯи ВКД.
Аммо корбарон дар фазои маҷозӣ аз Барзу Бобоев ҳимоят ҳимоят карда, мегӯянд, ки кормандоне бо дубаробари вазни ӯ ва ҳам надоштани савод дар вазоратҳо кор мекунанд ва касе онҳоро ба хотири “гаронвазнӣ”-яшон аз кор намеронад.
Бархе дигар аз корбарон менависанд, ки мақомот одамони босаводро дар сафи худ дидан намехоҳанд ва инро баҳонае барои ихроҷи шахсони саводдор медонанд.
Дар ҳамин ҳол бархе аз таҳлилгарони тоҷик мегӯянд, Эмомалӣ Раҳмон ва ҳукуматаш шароитро чунон сохтаанд, ки шаҳрвандони тоҷик медонанд ҳеч ниҳоди қазоие наметавонад мушкилоти онҳоро ҳал кунад, магар бо як ишораи худи раисҷумҳур ва ё фарзандону наздиконаш. Бинобар ҳамин, шаҳрвандон аксаран барои додхоҳӣ аз худи ӯ кумак талаб мекунанд, вале дар аксар ҳолат ин додхоҳии онҳо низ бепосух мемонад ва ҳақ ба ҳақдор намерасад.
