Дидбони ҳуқуқи башар гуфтааст, ки Толибон дар як моҳи ахир дар вилояти Панҷшери Афғонистон муртакиби “ҷинояти ҷангӣ” шудаанд.
Ба гузориши расонаҳои Афғонистон, Созмони Дидбони ҳуқуқи башар дар гузорише гуфтааст, ки нерӯҳои Толибон дар вилояти Панҷшер, дар шимоли Кобул, сокинонро ба иртибот бо “Ҷабҳаи Муқовимат” муттаҳам карда, сипас ғайриқонунӣ боздошт ва шиканҷа кардаанд.
Ин созмон дар гузориши худ гуфтааст, ки даргириҳо дар вилояти Панҷшер аз нимаи моҳи май, замоне, ки нерӯҳои муқовимат ба посгоҳҳои Толибон ҳамла карданд, шиддат гирифтааст.
Бар асоси ин гузориш, Толибон бо ҷобаҷогузории ҳазорон ҷангҷӯ ба ҳамлаҳои “Ҷабҳаи Муқовимат” вокуниш нишон дода, амалиёти ҷустуҷӯиро барои ҳадаф қарор додани афроде, ки иддао мекунанд бо “Ҷабҳаи Муқовимат” дар иртибот ҳастанд, анҷом додаанд.
Дар гузориш гуфта мешавад, ки Толибон дар ҷараёни амалиёти ҷустуҷӯӣ “ҷиноятҳои ҷангӣ” содир кардаанд.
Пас аз суқути давлати Афғонистон ба дасти Толибон дар 15-уми августи соли 2021 вилояти Панҷшер охирин минтақае дар Афғонистон буд, ки ба дасти ин гурӯҳ суқут кард ва аз оғози баҳори имсол то кунун борҳо дар ин минтақа даргириҳои шадид байни нерӯҳои зиддитолибонӣ бо сарбозони Амороти исломӣ рух додааст.
