Додгоҳи ноҳияи Шоҳманусри шаҳри Душанбе, рӯзноманигор ва блогери машҳури тоҷик Далер Имомалиро ба иттиҳоми ҳамкорӣ бо “созмонҳи мамнуъ” барои ду моҳ ба ҳабси пешакӣ гирифт.
Эмомалӣ Сайидзода рӯзноманигори тоҷик дар саҳифаи фейсбукияш навиштааст, ки “Додгоҳ Далери Имомалиро бо моддаи 307 қисми 2 муттаҳам дониста, парвандаашро махфӣ эълон кардаанд”.
Абдулло Ғурбатӣ ва Далери Имомалӣ шоми 15-уми июн ба додситонии ноҳияи Шоҳмансур даъват ва баъдан боздошт шуданд ва ҳоло дар боздоштгоҳи муваққатӣ (ИВС)-и шаҳри Душанбе қарор доранд.
Рӯзи 15-ми июн мақомот нисбати Далери Имомалӣ бар асоси моддаҳои 259 қисми 1 “фаъолияти соҳибкории ғайриқонунӣ” ва 346 қисми 2 банди А “дидаю дониста расонидани хабари бардурӯғ”-и Кодекси ҷиноятии Ҷумҳурии Тоҷикистон парвандаи ҷиноӣ боз карда буд. Вале имрӯз бошад Додгоҳ ба парвандаи ӯ боз моддаи 307 қисми 2 ҳамкорӣ бо “созмонҳои мамнуъ”-ро илова кард.
Далери Имомалӣ блогери машҳур ва рӯзноманигори тоҷик, узви Иттиҳоди рӯзноманигорони Тоҷикистон мебошад ва собиқаи кории журналистиро дар расонаҳои Радиои “Ватан”, Радиои “Имрӯз”, нашрияи “Имрӯз” ва масъули гурӯҳи театрии “Нигоҳи нав” дорад.
