Эҳтимол меравад Додгоҳи олии Тоҷикистон парвандаи Иззат Амонро аз нав баррасӣ кунад. Дар ин бора “Азия – Плюс” аз манобеаш хабар дод.
Гуфта мешавад, Додгоҳи олӣ рӯзи 16-уми ноябр пас аз баррасии шикояти вакили дифоъ ва наздикони Иззат Амон барои бозбинии парвандаи ӯ, аз онҳо хостааст, ки аз Вазорати корҳои дохилаи Тоҷикистон маълумотнома биёранд, ки парвандаи дигаре нисбати Иззат Амон боз шудааст ё на. Дар сурати набудани парвандаи наве интизор меравад, ҳукми эълоншуда нисбати ин ҳомии ҳуқуқи муҳоҷирон бори дигар баррасӣ шавад.
Коршиносон талаби чунин маълумотномаро амали нодир медонанд ва ба назари онҳо ба эҳтимоли зиёд Додгоҳи олӣ парвандаи Иззат Амонро бозбинӣ карданӣ нест. Чун ВКД ҳатман баҳоне пайдо хоҳад кард, ки Иззат Амонро боз гунаҳкор эълон кунад.
Ёдовар мешавем, ки 19 октябр Додгоҳи олии кишвар Иззат Амонро барои 9 сол аз озодӣ маҳрум кард.
Саидбурҳон Шарифон, вакили мудофеъи Иззат Амон ба расонаҳо гуфта буд, ки бо вуҷуди он ки зерҳимояааш ҳамаи зарарҳоро барқарор кардааст ва бояд додгоҳ ӯро шомили қонуни авфи мекард, вале накард:
“Додгоҳ умуман, қонунҳои амалкунандаи кишвар, аз ҷумла моддаи 49 Кодекси ҷиноятӣ ва моддаи 5 Қонуни ҶТ “Дар бораи авф”- ро поймол карда, ба зерҳимояи ман ҳукм содир кард. Ин ҳукм ғайриқонунӣ аст. Вақте ки қонун амал мекунад, додгоҳ бояд адолатро риоя кунад. Бояд нисбати зерҳимояи ман қонуни авф татбиқ мегардид.”
Вакили мудофеъ ҳукми додгоҳро ғайриқонунӣ хонда гуфта буд, ки аз болои он ба зинаҳои болоӣ шикоят мебарад.
То содир шудани ҳукм ҳуқуқшиносони тоҷик бар ин бовар буданд, ки тибқи Қонуни Ҷумҳурии Тоҷикистон “Дар бораи афв” Иззат Амон озод мешавад, вале тахмини ҳама нодуруст баромад.
