Додситонии кулли Тоҷикистон бо нашри изҳороте ҳукми чанд тан аз фаъолони зодаи Вилояти Мухтори Кӯҳистони Бадахшонро, ки соли гузашта боздошт ва бо иттиҳомоти сохта равонаи зиндон гардида буданд, “шарҳ” дод.
“Вокуниш”-и додситонӣ имрӯз, 26-уми январ дар сомонаи расмиаш нашр шуда, дар он гуфта мешавад, ки хабару мақолаҳои “иғвоангез” дар расонаҳои “мухолифони сиёсии дар кишварҳои Аврупо қарордошта” дар бораи Улфатхоним Мамадшоева, Фаромуз Иргашев, Музаффар Муборакшоён, Хурсанд Мамадшоев, Манучеҳр Холиқназаров ва Хушрӯз Ҷумъаев бо “мақсади халалдор намудани сохти конститусионии Ҷумҳурии Тоҷикистон ва суботу амнияти миллӣ” нашр мешаванд.
Ба иддаои Додситонӣ, ин фаъолони помирӣ “мусичаи бегуноҳ” набуда, “роҳбарони гурӯҳҳои ҷиноятӣ” мебошанд ва мувофиқи “ҷиноятҳояшон” ҷазо гирифтаанд.
Инчунин дар идома, Додситонии кулли кишва иттиҳомоти ин фаъолонро дарзикр карда, мегӯяд, Додгоҳи Олии Тоҷикистон онҳоро дар содир кардани ҷиноятҳо гунаҳкор дониста, дар натиҷа, “Иргашов Ф.И. ва Муборакшоён М.Т. аз рӯи маҷмӯи ҷиноятҳо ҷазои 29 солӣ маҳрум сохтан аз озодӣ, ба Мамадшоева У.М. аз рӯи маҷмуи ҷиноятҳо ҷазои 20 сол маҳрум сохтан аз озодӣ, ба Холиқназаров М.С. ва Мамадшоев Х.М. аз рӯи маҷмуи ҷиноятҳо ҷазои 16 солӣ маҳрум сохтан аз озодӣ ва ба Ҷумъаев Х.Ғ. ҷазои 8 сол маҳрум сохтан аз озодӣ” маҳкум шудаанд.
Ин изҳороти додситонӣ ва ҷинояткор эълон намудани чанд тан аз фаъолони помирӣ дар ҳолест, ки худи фаъолон ва наздикони онҳо иттиҳомоти мақомотро сохта номида, онро ба фаъолиятҳояшон рабт медиҳанд.
Созмонҳои байналмилалии ҳомии ҳуқуқ низ ин фаъолонро бегуноҳ медонанд ва озодии онҳоро аз мақомоти Тоҷикистон талаб доранд.
