Содир Ҷабборов раисҷумҳури Қирғизистон тайи як моҳи охир бори дуввумаст, ки ба вилояти Ботканд ҳаммарз бо Тоҷикистон сафар мекунад. Ӯ дар ин сафар мушкили аломатгузории марз бо Тоҷикистонро матраҳ намуд. Аммо аз даргирии хунини моҳи апрел сухане ба миён наовард.
“Акипресс” гузориш дод, ки Содир Ҷабборов дар ин сафар бо раванди сохти ду роҳи иртиботии ҷадид миёни деҳаи Оқсой ба минтақаи Минбулок ба дарозии 48 километр ва Самарқанди ба Доркам ба тӯли 41 км ошно гардид, ки бо поён ёфтани ин ду тарҳ барои рафтуомад миёни деҳаҳои қирғизнишин дигар ниёзе ба ворид шудан ба қаламрави Тоҷикистон нахоҳад буд.
Гуфта мешавад, ки роҳи дуввум заминаи иртиботии ноҳияҳои Ботканд ва Лайлаки Қирғизистонро бидуни воридшавӣ ба қаламрави Тоҷикистон фароҳам меорад.
Содир Ҷабборов дар дидор бо сокинони ин минтақа ва коргарони ширкатҳои роҳсозӣ гуфта, ки ду масири ҷадид барои Бишкек аҳамияти стратегӣ дорад ва мавзӯи аломатгузории марзи Қирғизистон ва Тоҷикистон низ чандон соддаву осон нест. Ва бояд барои ҳалли ин мушкил бархе манотиқ бо кишвари ҳамсоя иваз карда шавад.
Бо ин ҳол раисҷумҳури Қирғизистон оиди даргирӣ дар марзи Тоҷикистону Қирғизистон рӯзҳои 28 -29 апрели гузашта, ки беш аз 300 куштаву маҷруҳ бар ҷой гузошт сухане нагуфт.
Мақомоти Қирғизистон мегӯянд, дар даргирии хунини рӯзҳои 28-29 моҳи апрели гузашта миёни марзбонони ин кишвар ва Тоҷикистон 46 хона дар ноҳияи Ботканд ва 93 хона дар ноҳияи Лайлак ба таври комил вайрон шуда аст.
Ҳамчунин онҳо аз вайронии 5 мактаб, 2 маркази тиббӣ, 3 кӯдакистон, 2 постгоҳи пулис, 2 постгоҳи марзбонӣ, 24 маркази сухтгирӣ ва 60 дукони тиҷоратӣ хабар доданд.
