Вазорати корҳои дохилии Тоҷикистон аз боз шудани парвандае хабар дод, ки гумонбар бо роҳи фиреб аз худ кардани наздики ним миллион доллар муттаҳам мешавад.
Тавре дар хабари вазорат омада, ШВКД дар ноҳияи И.Сомонӣ бо иддаои як сокини 45-солаи пойтахт дар бораи бо роҳи фиреб рабуда шудани 406 ҳазор доллари амрикоияш аз ҷониби як сокини 57-солаи шаҳри Хуҷанд ва як сокини 38-солаи шаҳри Душанбе парванда боз када, таҳқиқро оғоз кардааст.
Гуфта мешавад, “15-уми феврали соли 2021, марди 38-солаи сокини шаҳри Душанбе ва марди 57-солаи сокини шаҳри Хуҷанд, бо роҳи фиреб ба бовариаш даромада, барои равнақ додани тиҷорати сӯзишворӣ аз ӯ 406 ҳазор доллари амрикоӣ гирифта, то ҳол маблағашро барнагардонидаанд.”
ВКД бар асоси маълумоти пешниҳод намудаи шаҳрванди 45-солаи пойтахт нисбати гумонбаршавандагон бо моддаи 247 қисми 4 Кодекси ҷиноятии Ҷумҳурии Тоҷикистон парвандаи ҷиноятӣ оғоз кардааст. Аммо аз боздошти гумонбаршудагон чизе гуфта намешавад.
