Эмомалӣ Раҳмон Президенти Тоҷикистон дар паёми табрикоти идонааш аз мардум хостааст, ки “сарфаю сариштакор” бошанд.
Субҳи имрӯз, 8-уми июли соли 2022, Эмомали Раҳмон дар паёми табрикотии идонааш ба мардум гуфтааст, “таъкид менамоям, ки ҳар як оила бояд дар фикри омодагии ҳарчи беҳтар ба мавсими тирамоҳу зимистон бошад ва талаботи қонуни танзимро ба таври қатъӣ риоя намояд.”
Президенти Тоҷикистон бар хилофи солҳои пешин, ки ба навъе қурбонӣ карданро дар ин рӯзҳои ид тибқи Қонуни ҶТ “Дар бораи танзими анъана ва ҷашну маросим” маҳдуд мекард, имсол гуфтааст, ки “дар рӯзи ид шахсони дорои имконияти моддӣ дар роҳи Худо қурбонӣ мекунанд.”
Президенти Тоҷикистон дар ин паёми худ меафзояд: “Бовар дорам, ки дар рӯзҳои таҷлили иди Қурбон – ин ойини дастгирии ҳамдигарӣ, сабру таҳаммул ва хайру эҳсон – ҳамватанони мо ба ҷойи сарфу хароҷоти беҳуда ва зоҳирпарастиву худнамоӣ ба хотири расонидани кумак ба ҳамдиёрони ниёзманд, ятимону маъюбон, дастгирии оилаҳои камбизоат ва ободонии Ватан иқдомоти хайру савобро анҷом медиҳанд.”
Аммо ин таъкидҳо ва даъватҳои Эмомалӣ Раҳмон дар замоне садо додааст, ки ҳанӯз 10 рӯз пеш худи ӯ дар вақти сафари раиси ҷумҳури Русия ба Тоҷикистон садҳо килло мававу сабзавотҳои мухталифро барои худнамоӣ дар саҳну долонҳои бустонсарои ҳукуматӣ пеши пойи Владимир Путин ба намоиш гузошта буд.
Исрофкории аз ҳад зиёд ва худнамоии беҳамтои Эмомалӣ Раҳмон дар назди Владимир Путин аз як сӯ то ҳол мавҷи қаҳру ғазаб ва нафрини корбарони тоҷик дар шабакаҳои иҷтимоиро фурӯкаш накардааст ва аз сӯи дигар ин рафторҳои нобихрадона боиси шармандангӣ барои як миллат дар сатҳи ҷаҳонӣ шудааст.
Аз ҷониби дигар Эмомалӣ Раҳмон дар бораи сафари беш аз 5 ҳазор зоири тоҷикистонӣ барои анҷоми фаризаи Ҳаҷ ба Арабистони Саудӣ ҳеч ишорае накардааст, вале бо овардани ду байт аз шоире, ки гуфтааст: “Дил ба даст овар, ки ҳаҷҷи акбар аст,
Аз ҳазорон Каъба як дил беҳтар аст.
Каъба бунёди Халили озар аст,
Дил назаргоҳи Ҷалили акбар аст.”, талош кардааст, ки аз ҳурмат ва азамати ин фаризаи Илоҳӣ бикоҳад.
Гуфтанист, даъватҳо ва таъкидҳои Эмомалӣ Раҳмон ва тарс додани мардум аз ин ки мегӯяд, “27 кишвари дунё ба хатари гуруснагӣ рӯбарӯ” ҳастанд” замоне таъсиргузор хоҳанд буд, ки худи ӯ ва ҳукуматаш дар робита ба дороиҳои давлатӣ “сарфаю сариштакор” ва намунаи ибрат барои дигарон бошанд ва на он ки бо беҳуда сарфу харҷ кардани миллионҳо сомонӣ дар ҷашну маросим нафрати мардумро ба вуҷуд биоранд.
Амруллоҳи Низом, махсус барои Аздо тв
