Раиси Комиссияи олии интихобти Туркия Аҳмад Янор дар интихоботи президентии кишвараш Раҷаб Тайиб Эрдуғонро баранда эълон кард.
Дирӯз, 28-уми май дар Туркия даври дуюми интихоботи президентӣ байни номзади эътилофи “Ҷумҳур” Раҷаб Тайиб Эрдуғон ва эътилофи “Миллат” Камол Қличдоруғлу баргузор шуд.
Пас аз шумориши 99.85% сандуқҳои раъй, Аҳмад Янор бо баргузории нишасти матбуотӣ дар Анқара пеш аз эълони натиҷаи ниҳоӣ аз пирӯзии Эрдуғон хабар дод.
Бино ба гуфтаи раис Комиссияи олии интихоботи Туркия, Раҷаб Тайиб Эрдуғон дар дохил ва хориҷи кишвараш 52.16 дарсад ва рақиби ӯ Камол Қличдоруғлу 47.84 дарсади ороро касб карданд.
Аммо ба таври ҷудогона дар хориҷ аз Туркия 59.39 дарсади интихобкунандагон ба раисҷумҳури феълӣ ва 40.61 дарсад ба номзади эътилофи “Миллат” овоз доданд. Дар дохили кишвар бошад, Эрдуғон 51.91 дарсад ва Камол 48.09 дарсади овозҳоро касб карданд.
Бино ба иттилои Комиссия олии интихоботи Туркия, шумораи интихобкунандагон дар кишвар беш аз 60 миллион нафарро ташкил медиҳад, ки дар умум 85.71% онҳо дар интихоби президенти ояндаи худ ширкат карданд.
Даври якуми интихоботи президентии Туркия рӯзи якшанбе, 14-уми майи соли ҷорӣ баргузор шуда буд. Дар он Раҷаб Тайиб Эрдуғон аз эътилофи “Ҷумҳур” 49.52%, Камол Қличдоруғлу аз эътилофи “Миллат” 44.88%, Синон Уғон аз эътилофи ОТО 5.17% ва Муҳррам Инҷе, ки як рӯз пеш аз интихобот номзадияшро пас гирифта буд, 0.43%-и овозҳоро ба даст оварда буданд.
Синон Уғон 22-уми май зимни нишасти матбуотие хабар дода буд, ки рӯзи 28-ум аз Эрдуғон ҳимоят хоҳад кард.
Аксар таҳлилгарон бар ин назар буданд, ки пуштибонии Синон Уғон, ки беш аз 2,8 миллион нафар ба ӯ овоз дода буд, аз яке ин ду номзад – Раҷаб Тайиб Эрдуғон ва Камол Қличдоруғлу метавонад нақши калидӣ дар интихоботи президентӣ ва онядаи кишвараш дошта бошад.
