Қуръонсузӣ ва лагадмол кардани китоби муқаддаси мусалмонон дар давлатҳои искондинавӣ кишварҳои Арабистони Саудӣ, Эрон ва Ироқро барои мубориза бо ин шакли исломҳаросӣ муттаҳид кардааст.
Бино ба иттилои расмӣ, 31-уми июли соли 2023 “ҷаласаи 18-уми ғайринавбатии Шӯрои вазирони корҳои хориҷии Созмони ҳамкории исломӣ дар шакли маҷозӣ” баргузор шуд.
Дар ин ҷаласа, ки бо даъвати кишварҳои Арабистони Саудӣ, Ироқ ва Эрон сурат гирифт, ҳамагуна шаклҳои исломҳаросӣ ва бахусус қуръонсӯзӣ дар давлатҳои Шветсия ва Донморк маҳкум карда шуд.
Дар матни баёнияе, ки пас аз ин нишаст дар сомонаи расмии Созмони ҳамкории исломӣ нашр шуд, таъкид шудааст, ки банди “муборизи бо исломҳаросӣ” бояд дар рӯзномаи тамоми нишастҳои муштараки ин созмон бо дигар ташкилотҳои минтақавӣ ва ҷаҳонӣ ворид карда шавад ва ин масъала мавриди баррасӣ қарор бигирад.
Вазорати корҳои хориҷии Тоҷикистон ҳам бори дигар ин падидаи шумро маҳкум карда, гуфтааст, “паёми сулҳ, шафқат ва таҳаммулпазирии Қуръон ва таъкиди он ба илму дониш барои тамоми башарият дар ҳама давру замон зарур мебошад.”
Ҳамзон Созмони кишварҳои исломӣ аз тамоми кишварҳои узв ва созмону ташкилотҳои исломӣ хостааст, ки амалҳои қуръонсӯзӣ ва лагадмол кардани онро, ки бахше аз падидаи исломҳаросӣ дониста мешаванд, ба такрор маҳкум кунанд. Инчунин талош варзанд, ки аз роҳҳои қонунӣ ин рафторҳои нафратангезро, ки эҳсосоти беш аз ду миллиард мусалмонро ҷариҳадор мекунад, дар қонунгузории давлатҳои худ ҳамчун як ҷиноят бишиносанд.
Гуфта мешавад, дар давоми камтар 40 рӯзи амали қуръонсӯзӣ ва лагадмол кардани дасти кам 4 маротиба дар кишварҳои Шветсия ва Донморк сурат гириф, ки хашму ғазаби миллионҳо мусалмонро дар гӯшаҳои мухталифи дунё ба вуҷуд овард.
Аз сӯи дигар, ин амалҳои нописанди қуръонсӯзӣ дар ғарби Аврупо боис шудааст, ки кишварҳои исломӣ дар Ховари Миёна, шимоли Африқо ва ғарби Осиё ба мисли Эрону Ироқ, Туркияву Миср, Қатару Кувайт, Молезияву Урдун ва Покистону Арабистони Саудӣ ва ғайраро ба ташкили эътилофе муштарак барои мубориза бо исломҳаросӣ бо ҳам муттаҳид кунад.
