Субҳи имрӯз дар шаҳри Душанбе сафирони навтаъйини даҳ кишвар эътимодномаҳои худро ба Президенти Тоҷикистон супориданд.
Бино ба иттилои расмӣ, субҳи имрӯз, 9-уми марти соли 2023 сафирони кишварҳои ИМА, Туркия, Қатар, Молдава, Ирландия, Партугалия, Кипр, Чилӣ, Уганда ва Зеландияи Нав эътимодномаҳои худро ба Эмомалӣ Раҳмон тақдим карданд.
Ба қавли манбаъ, дар рафти ин мулоқоти Президенти Тоҷикистон ва сафирони фавқулъода ва мухтори кишварҳои номбурда таъкид гардида, ки “Ҷумҳурии Тоҷикистон, дар асоси Консепсияи сиёсати хориҷии худ ҷиҳати таҳкими муносибатҳои дӯстӣ ва пешбурди ҳамкориҳои судманд бо ҳамаи кишварҳои ҷаҳон кӯшишҳои пайваста ба харҷ медиҳад.”
Гуфта мешавад, ҳамзамон тайи ду рӯзи ахир “сафирони фавқулодда ва мухтори Иёлоти Муттаҳидаи Амрико Мануел Микаллер, Туркия Умут Аҷар, Давлати Қатар Муборак Абдураҳмон Муборак ал-Наср, Ҷумҳурии Молдова Лилиан Дарий, Ҷумҳурии Ирландия Брайан Макэлдафф, Португалия хонум Мария Мадалена Лобу Карвалю Фишер, Ҷумҳурии Кипр Кипрос Йоргалис, Ҷумҳурии Чилӣ Эдуардо Эскобар, Ҷумҳурии Уганда Муҳаммад Тезикуба Кисамбира ва Зеландияи Нав хонум Сари Мэри Уолш, нусхаҳои эътимодномаҳои” худро низ ба муовинони Вазири корҳои хориҷӣ тақдим карда буданд.
