Мақомоти Олмон расман иттилоъ доданд, ки фаъоли сиёсии Тоҷикистон Абдуллоҳи Шамсиддинро ба Тоҷикистон ихроҷ карданд. Аммо нагуфтанд, ҳоло ӯ дар куҷост?
Шамсиддини Саид, фаъоли сиёсӣ ва яке аз раҳбарони Ҳизби наҳзати исломии Тоҷикистон дар як суҳбати кӯтоҳ имрӯз ба Azda tv гуфт, пас аз дархости онҳо мақомоти Олмон расман иттилоъ доданд, ки писараш Абдуллоҳи Шамсиддинро рӯзи 18-уми январи соли 2023 ба Тоҷикистон ихроҷ карданд.
Ба қавли ин фаъоли сиёсии Тоҷикистон бо гузашти беш аз 9 шабонарӯз то ҳол на ҷониби мақомоти олмонӣ ва на ҷониби мақомоти тоҷикистон дар бораи сарнавишти писараш Абдуллоҳи Шамсиддин ҳеч иттилое надодаанд ва нагуфтаанд, ки вай дар куҷо ва дар чӣ шароите қарор дорад?
Аз сӯи дигар, раҳбари ҷунбиши “Ватандор” Додоҷон Атовуллоев, ихроҷи ин писари фаъоли сиёсии Тоҷикистонро аз Олмони демократӣ ба Тоҷикистони “демократӣ” як лаккаи нанг дониста гуфтааст, “номи ин амал ҷинояти башарӣ ва хиёнат бар демукросӣ ва ҳуқуқи инсон аст.”
Раҳбари ҷунбиши “Ватандор” таъкид карда, ки намедонам давлатмардонӣ олмонӣ дар робита ба ин қазия чӣ эҳсосе доранд, аммо “агар Олмон Абдуллоҳро барнагардонад, ин амал чун як доғи сиёҳ ба ҳамеша бар пешонааш хоҳад монд.“
Гуфта мешавад, Паймони миллии Тоҷикистон ва Кумитаи наҷоти гаравгонҳо ва зиндониёни сиёсии Тоҷикистон, ки то кунун дар чунин қазияҳо фаъол буданд, дар бораи парвандаи Абдуллоҳи Шамсиддин то ҳол расман ба расонаҳо чизе нагуфтаанд. Аммо бо ин вуҷуд, интизор меравад, рӯзҳои наздик ҷамъе аз мухолифон дар якҷоягӣ бо дигар гурӯҳҳо иқдомҳоеро дар ин бора рӯи даст бигиранд.
