Русия бо баргузории мурофиаи додгоҳӣ баҳси шомил кардани ширкати Meta (Facebook, Instagram, WhatsApp)-ро дар гурӯҳҳои экстремистӣ ва мамнуъ дар ҳудуди Русия баррасӣ мекунад.
Тавре “РИА Новости” хабар медиҳад, имрӯз 21-уми март Додгоҳи Тверскии шаҳри Маскав ба баррасии даъво дар бораи эътирофи ширкати пурнуфузи “Meta” ҳамчун созмони ифротӣ ва манъи фаъолияти он дар Русия шуруъ кардааст.
Гуфта мешавад, дар ҷаласаи додгоҳ ду додситонӣ, намояндагони ФСБ ва Роскомнадзор ширкат доранд. Ширкати Марк Зукербергро ду вакили дифоъ намояндагӣ мекунанд.
Мақомоти Русия иддао доранд, ки “Meta Platforms” дар пайи ҳаводиси Украина дар Фейсбук ва Инстаграм мухолифи сиёсаташ амал карда даъватҳои хушунатомез алайҳи Русия ва низомиёни онро муваққатан иҷозат дод, дар ҳоле, ки чунин даъвоҳо қаблан бар зидди ҳеч кишваре иҷозат дода намешуд.
Дар пайи ин иқдоми моликони “Meta” Роскомнадзори Русия бо дархости Додситонии кулли ин кишвар дастрасӣ ба Instagram дар ҳудуди Русияро ба далели “даъватҳо ба хушунат алайҳи русҳо” маҳдуд кард. Аз рӯзи душанбеи гузашта Instagram аз суроғаҳои IP-и Русия дастнорас аст.
Пеш аз ин, Роскомнадзор дастарсӣ ба Facebook-ро ҳам дар ҳудуди Русия ба далелҳои боло масдуд кард.
Пас аз ҳамлаи низомии Русия ба хоки Украина интиқодҳои Ғарб болои Русия бештар шуд ва ин кишвар мавриди таҳримҳои шадид қарор гирифт. Русия ҳамлаи низомияшро ба хоки Украина “амалиёти махсус” ном мебарад, аммо мақомоти Киев ва давлатҳои ғарбӣ онро “ҳуҷуми бедалел ва нобахшидании Русия ба хоки Украина” унвон кардаанд.
