Фаромуз Иргашов бо нашри муроҷиати видеоии навбатияш эълом дошт, ки дар давоми чаҳор рӯз аллакай 21 ҳазор имзои иловагиро ҷамъоварӣ кардааст ва умед дорад то рӯзи муайянгардида имзоҳои лозимаро пурра ҷамъоварӣ мекунад.
Фаромуз, ҷавони ҳуқуқшиноси 30-сола ва номзади худпешбар ба интихоботи президентии 11 октябр, дар муроҷиати видеоии навбатияш, ки дар Ютуб бо номи “Ҷавоби Фаромуз ба намояндагони ҳукумати ВМКБ” нашр шуд, мегӯяд, дар таърихи 7 сентябр аз ҷониби мақомоти ВМКБ матлабе нашр шуд, ки муааллифони он яке Ғолиб Ниятбеков ва дигарӣ Насим Саидраҳмонов мебошанд, ки дар он тартиби гузарондани интихобот, тартиби пешбарӣ намудани шаҳрванд ба мақоми президент, тартиби ҷамъоварии имзоҳо ва инчунин насиҳатҳои ҳуқуқие ба худи Фаромуз низ ироа шудааст. Ин ҷавони худпешбар амали мақомоти ВМКБ-ро аз нигоҳи ҳуқуқӣ баҳо дода, мегӯяд, ки ин ду корманди мақомот аз салоҳияти худ по фаротар гузоштаанд ва тибқи қонун ҳақи фаҳмондадиҳӣ надоранд. Аз ин рӯ, аз болои онҳо ба додгоҳ имрӯз 11 сентябр шикоят хоҳад бурд.
Ӯ мегӯяд, вақте Иброҳимҷон Юсуфбеков як шаҳрванд аз вилояти Суғд аз пешбарии номзадии худ ба мақоми президентӣ хабар дод, “касе аз мақомот аз ӯ эроде нагирифт, аммо вақте ман мисли ӯ номзадиямро пешбарӣ намудам, тамоми мақомот ба кори ман дахолат намуда, монеаҳои сунъӣ эҷод мекунанд”. Ӯ мегӯяд, қонун барои ҳама як аст.
Ба гуфтаи Иргашов, ин амалкарди “насиҳатгарон” далели бемасъулиятӣ, хунукназарӣ ва беқонуниятии мақомоти ВМКБ дар қиболи як маъракаи муҳими сиёсӣ мебошад. Ӯ аз фишори мақомот нигаронӣ намуда, афзуд, ки шаҳрванд Юсуфбеков мисли ӯ низ худпешбар аст, чаро ба кори ӯ дахолате сурат намегирад, вале инро намегузоранд, ки раванди имзоҷамкуниро ба анҷом расонад? “Талаботи қонун бояд барои ҳама як бошад, қонун барои як шаҳрванд модар аст ва барои як шаҳрванди дигар модари угай”, – мегӯяд ин ҷавони номзади худпешбар.
Дар суҳбати видеоияш Иргашов умедворӣ кардааст, ки то ба охир расидани мӯҳлати ҷамъ намудани имзоҳо метавонад, он миқдор имзоҳоеро, ки қонунгузорӣ талаб мекунад, ҷамъоварӣ кунад.
Ин дар ҳолест, ки тибқи қонугузории интихоботӣ дар Тоҷикистон бояд як номзаде, ки мехоҳад дар интихоботи президентӣ ширкат варзад, ҳадди ақал 250 ҳазор имзои шаҳрвандонро ҷамъоварӣ намояд, тономзадияш ба қайд гирифта шавад.
Қарор аст 11 октябри соли равон интихоботи президентӣ дар Тоҷикистон баргузор шавад, то ҳоло аз 7 ҳизби амалкунанда дар кишвар 6 ҳизб номзади раисони худро ба ин маъракаи муҳими сиёсӣ пешбарӣ кардаанд. Танҳо Ҳизби сотсиал-демократи Тоҷикистон, ки Раҳматилло Зоиров роҳбарияш мекунад, интихоботро таҳрим кардааст. Ин ҳизб баргузории интихоботро ғайриқонунӣ хонда, иштирок дар онро низ қонуншиканӣ гуфтааст.
Муроҷиати видеоияшро ба шакли пурра инҷо тамошо кунед.
