Додгоҳ Абдуллоҳи Шамсиддин, фаъоли сиёсии тоҷикро ба 7 соли зиндон маҳкум кард.
Мурофиаи аввали додгоҳии ин фаъоли тоҷик рӯзи 28-уми марти соли 2023 дар Додгоҳи ноҳияи Синои шаҳри Душанбе паси дарҳои баста баргузор гардида, шоҳидон ва худи Абдуллоҳ пурсида шудаанд.
Бино ба иттилои манобеи Azda.tv, дар рафти мурофиа Абдуллоҳ эътироф кардааст, ки “зери посте лайк гузоштааст ва дар кадом тазоҳуроте ширкат кардааст”.
Додрас имрӯз, 29-уми март ҳукми Абдуллоҳи Шамсиддинро содир карда, ӯро ба ҳафт соли зиндон маҳкум кардааст. Гуфта мешавад Додгоҳи ноияи Синои шаҳри Душанбе ӯро бо моддаи 307 қисм 1-и Кодекси ҷиноятии Тоҷикистон гунаҳкор донистааст. Вале маълум нест ин фаъоли тоҷик ба вакили дифоъ дастрасӣ дошт ё не.
Пештар аз ин, Ҳю Виллиамсон, раиси бахши Аврупо ва Осиёи Марказии Cозмони Дидабони Ҳуқуқи Башар (HRW) дар ҳисоби твиттериаш навишта буд, ки “то ҷое ба HRW маълум гашт, 28-уми март Абдуллоҳи Шамсиддин, як фаъоли сиёсӣ, ки ахиран аз Олмон ихроҷ шуда буд, метавонад дар Душанбе ба додгоҳ кашида шавад.”
Ҷаноби Виллиамсон ба далели набудани низоми мустақили додгоҳӣ дар Тоҷикистон, аз нозирони байналмилалӣ даъват карда буд, ки дар мурофиаи Абдуллоҳи Шамсиддин ширкат кунанд.
Абдуллоҳи Шамсиддин дар ҳоле ба зиндон маҳкум мешавад, ки аз замони ихроҷаш аз Олмон ба Тоҷикистон беш аз ду моҳ мегузарад, мақомоти кишвар расман нисбати ин фаъоли тоҷик айб эълон накарда буданд ва то имрӯз ҳеч ниҳоди қудратии кишвар дар боздошт нигоҳ доштани ӯро ягон намегуфтанд. Ҳатто дар нишастҳои матбуотӣ ҳам ВКД ва ҳам додситонии кул аз куҷо будани Абдуллоҳ изҳори бехабарӣ карданд.
Ёдовар мешавем, ки мақомоти Олмон 18-уми январи соли ҷорӣ Абудллоҳи Шамсиддин, писари узви аршади ҲНИТ Шамсиддини Саидро ба далели камбуд дар асноди буду бош ва адами ифшои ҳувият аз Олмон ба Тоҷикистон ихроҷ кард. Гуфта мешавад, Абдуллоҳ пас аз ихроҷ аз Олмон дар Фурӯдгоҳи байналмилалии шаҳри Душанбе тавассути мақомоти тоҷик боздошт ва ба ҷои номаълум бурда шуд.
Пас аз ихроҷи ӯ то кунун чандин гирдиҳамоӣ ва эътирозҳое аз ҷониби мухолифин ва ҳамкорону дӯстони олмонии Абдуллоҳ сурат гирифт. Борҳо созмонҳои байналмилалӣ, фаъолони олмонӣ ва тоҷик аз мақомоти расмии Тоҷикистон хостанд, ки макони буду боши ӯро эълон намуда, раҳояш кунанд.
