Шоми дирӯз, 6-уми июл, дар даври бозиҳои ниманиҳоии Евро-2020 дар Лондон Италия Испанияро шикаст дод.
Мунтахаби футболи Италия дар даври ниманиҳоии Евро-2020 дастаи Испанияро аз рӯи пеналтӣ мағлуб кард.
Замони асосӣ ва изофии бозӣ 1:1, яъне мусовӣ анҷом ёфт. Футболбозоне, ки дар замони асосӣ гол заданд, ҳарду бозигарони Ювентусанд.
Ҳисобро дар дақиқаи 60-ум бозигари тими мунтахаби Италия Федерико Киеза боз кард. Алваро Мората аз Испания дар дақиқаи 80-ум ҳисобро баробар кард. Дар вақти изофӣ ҳисоб тағйир наёфт.
Италия аз рӯи пеналтӣ бо ҳисоби 4:2 ғолиб омад. Хатои ҳалкунандаро Мората ба амал овард ва пеналтии охиринро Ҷорҷино аз Италия ба ҳадаф расонд.
Бозӣ дар Лондон дар стадиони “Уэмбли” баргузор шуд.
Имрӯз, 7-уми июл бозии дуввуми ниманиҳоӣ дар ҳамин стадион бо иштироки тимҳои Англия ва Дания баргузор мегардад.
Рӯзи 11-уми июл бозии ниҳоӣ дар ҳамин майдон, яъне дар “Уэмбли”баргузор мегардад.
