Дар шаш моҳи соли 2024 воридоти маҳсулоти нафтӣ ва гази моеъ дар Тоҷикистон дар муқоиса бо ҳамин давраи соли гузашта 10,3 % зиёд шудааст.
Имрӯз, 25-уми июл, вазири энергетика ва захираҳои оби кишвар Далер Ҷумъа зимни нишасти матбуотӣ гуфт, ки дар моҳҳои январ-июни соли ҷорӣ ба Тоҷикистон 783,8 ҳазор тонна маҳсулоти нафтӣ ва гази моеъ ворид гардидааст.
Аз ин миқдор маҳсулоти нафтӣ ва гази моеъ 524,2 ҳазор тоннаи он аз Русия ба Тоҷикистон ворид шудааст.
Аммо бо вуҷуди воридоти зиёд, дар як ҳафтаи ахир якбора нархи гази моеъ дар нуқтаҳои фурӯши сӯзишворӣ дар тамоми кишвар беш аз 20% гарон шуда, аз 5 сомонию 80 дирам барои як литр ба 7 сомонӣ расидааст.
Сабаби аслии гарон шудан ва камёфт шудани нархи ин навъи сӯзишворӣ маълум нест, аммо Вазорати энергетикаи кишвар онро ба кам будани талаботи сокинон ва зиёд шудани автомобилҳои барқӣ рабт додаанд.
Коршиносон иддаои Вазоратро мантиқӣ намедонанд ва мегӯянд, баръакс, бо кам шудани талабот нархҳо бояд поин раванд ва иллати асосии болоравии нархҳоро ба набудани рақобат дар ин соҳа ва инҳисори он аз ҷониби наздикони раисҷумҳур медонанд.
