Ба иттилои Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон давоми 6 моҳи гузашта 84 нафар дар обҳои кишвар ғарқ шуда ба ҳалокат расидаанд.
Дар ин бора имрӯз, 26-уми июл раиси Кумитаи ҳолатҳои фавқулоддаи Тоҷикистон генерал-полковники милитсия Рустам Назарзода зимни нишасти матбуотии ниҳодаш хабар дод.
Раҳбари кумита мегӯяд, бо вуҷуди огоҳӣ додани зиёд ба шаҳрвандон, мутаассифона, боз ҳам одамон дар обҳои кишвар ғарқ шуда ҳалок мешаванд.
“Ба сабаби риоя накардани қоидаҳои шиноварӣ ҳангоми оббозӣ дар рӯду кӯлҳои кишвар дар шаш моҳи охир 84 нафар (соли 2021 – 69) ба ҳалокат расиданд. Ҳафт нафари инҳо то 4-сола буданд, 15 нафар аз 5 то 10 сол доштанд, 24 нафар аз 11 то 16 – сола, 27 нафар аз 17 то 35 ва ёздаҳ нафари дигар болотар аз 35-сола буданд.”, афзуд Рустам Назарзода.
Инчунин раиси Кумитаи ҳолатҳои фавқулоддаи кишвар иброз дошт, ки дар қаламрави кишвар 1209 мавзеъҳои хатарнок муайян шудааст, ки ҳангоми селу офатҳои табиӣ ба ҷони наздик ба 400 нафар аз аҳолии кишвар таҳдид мекунад.
Ӯ гуфт: “дар ин шаш моҳи сипаришуда аз ҷониби сохторҳои дахлдори Кумита дар шаҳру ноҳияҳои ҷумҳурӣ ташхиси минтақаҳои осебпазир гузаронида шуд.Муайян гардид, ки дар ҳудуди ҷумҳурӣ 1209 мавзеъҳои хавфнок вуҷуд доранд, ки дар ҳудуди онҳо 72 ҳазору 629 хоҷагӣ ва 391 ҳазору 304 нафар аҳолӣ зиндагӣ мекунанд. Вай ба он таъкид кард, ки қисми зиёди ин мавзеъҳо ба селҳо ва обхезиҳо осебпазиранд.”
