Шоми рӯзи 11-уми октябри соли ҷорӣ гурӯҳе аз шаҳрвандон ва фаъолони мадании Лаҳистон бо шумули шаҳрвандони хориҷии муқими ин кишвар ба ҷонбидорӣ аз мардуми Ғазза гирдиҳамоӣ баргузор карданд.
Дар ин гирдиҳамоӣ дасти кам беш аз 300 нафар ҷамъ омада, алайҳи ҳамлаҳои густардаи Исроил болои мардуми Ғазза ва дар муҳосираи куллӣ қарор додани ин минтақа шиъор доданд.
Тазоҳургарон дар даст шиорҳои “Наслкуширо мутаваққиф кунед!”, “Бар кӯдакон ва мардуми Ғазза раҳм кунед!”, “Ҳамбастагӣ бо муқовимати Фаластин” ва амсоли инро дар даст дошта, ҳамлаи Исроил бар Ғаззаро маҳкум карданд.
Баргузоркунандагони ин гирдиҳамоӣ мегӯянд: “мо барои баён кардани мухолифати худ ба истилое, ки 75 сол боз идома дорад, ҷамъ омадаем.” Ҳамчунин иштирокдорони ин гирдиҳамоӣ аз ин ки ҳоло Ғазза пурра муҳосира шуда, обу ғизо, барқу газ ба рӯи аҳолии он қатъ шудааст, ибрози нигаронӣ карда, Ғаззаро ба “бузургтарин зиндони ҷаҳон” ташбеҳ карданд.
Ҳамзамон тазоҳургарон мегуфтанд, ки “мо ба бомбаборон кардани хонаҳо, беморхонаҳо, мактабҳо ва ҷойҳои ҷамъиятӣ мухоилфем. Бомборон кардани ин маконҳои ҷамъиятӣ ҷинояти ҷангӣ ба ҳисоб мераванд ва ҳеч сурат набояд онҳо тахриб шаванд.”
Ин гирдиҳамоии эътирозӣ ва дар пуштибонӣ аз мардуми Фаластин дар кишвари аврупоӣ дар ҳолест, ки Аврупо ва Амрико расман аз Исроил ва мардуми ин кишвар пуштибонӣ карданд ва ҲАМОС-ро дар ин ҳамла гунаҳкор дониста, амалашро “террористӣ” унвон кардаанд. Ҳамчунин аз гирдиҳмоие ба ин монанд дар Олмон пешгирӣ шуд ва ҳатто иштирокдорони он боздошту бозпурсӣ шуданд.
Ёдовар мешавем, ки субҳи рӯзи 7-уми октябри соли ҷорӣ ҷабҳаи Қассом – шохаи низомии ҲАМОС бар минтақаи шаҳракнишинони Исроил дар минтақаи девори Ғазза ҳамла карда, чандин низомӣ ва ғайринизомиро асир гирифтанд. Дар давоми ин чанд рӯз дар пайи ҳамлаҳои ду тараф омори кушташудагон аз ҷониби Исроил ба беш аз 1200 нафар расида ва кушташудагони Ғазза марзи 1000 нафарро гузашт.
