Танҳо давоми 24 соати гузашта 14 нафар дар Навори Ғазза ба сабаби гуруснагии шадид ҷони худро аз даст доданд, ки ду нафарашон кӯдакони навзод буданд.
Масъулони бемористонҳои Ғазза ба расонаҳо гуфтанд, аз байни 147 нафаре, ки ба сабаби гуруснагӣ ва камбуди ғизо ҷон бохтанд, 88 нафарашон кӯдакон буданд. Ва эҳтимол дорад адади маргу мир ба сабаби камбуди ғизо афзоиш ёбад.
Қарор буд, рӯзи гузашта мошинҳои боркаши маводи ғизоӣ вориди Ғазза бишаванд, аммо ба гуфтаи расонаҳо, пас аз 4 моҳи муҳосираи шадид, ки 1 мошин ҳам ворид нашуда буд, ба 73 мошини боркаш иҷозати вуруд доданд.
Гуфта мешавад, бар иловаи мошинҳо кишвари Урдун дар ҳамроҳӣ бо Имороти Муттаҳидаи Арабӣ як ҳавопаймо бо 25 тонна маводи ғизоӣ аз осмон партоб карданд, вале ин ҳама дар маҷмуъ 1 дарсади иҳтиҷоти мардуми Ғаззаро бартараф намекунад.
Хабарнигори Ал-Ҷазира аз Ғазза рӯзи душанбе ба ин расона гуфт, ки дирӯз аз ҷониби гузаргоҳи Зекким ба шимоли Ғазза бояд мошинҳои кумаки маводи ғизоӣ ворид мешуд, аммо нерӯҳои исроилӣ қасдан ҳамаи онҳоро боздоштанд ва нагузоштанд як мошини боркаш вориди шимоли Ғазза бишавад. Гуфта мешавад, нерӯҳои исроилӣ қасдан обро қатъ мекунанд, ки ин вазъият гуруснагӣ ва ташнагиро болои беш аз 2 миллион аҳолии ин борика ба бор овардааст.
Бар иловаи ин гуруснагиҳову камбуди дору, боз нерӯҳои исроилӣ бомборонҳои шадиду пай дар пайро дар Ғазза анҷом медиҳад, ки вазъи инсониро дар ин борика тоқатфарсо кардааст. Ба хусус онҳое, ки дар навбати ғизо меистанд садҳо нафарро нерӯҳои исроилӣ ба қатл мерасонад.
