Блогери шинохтаи доғистонӣ Хасбулло Муҳаммадов, ки миёни корбарони шабакаҳои иҷтимоӣ бо лақаби “Хасбик” маъруф аст, ба Душанбе сафар кардааст.
Дар ин бора худи Хасбик бо гузаштони чанд аксу навор аз пойтахти Тоҷикистон, ки якеаш аз тирезаи меҳмонхои “Hyatt Regency Dushanbe” гирифта шудааст, дар саҳифаи Инстаграмаш хабар дод.
Маълум нест ин блогери шинохта, ки дар Instagram 8,6 миллион дунблкунанда дорад бо даъвати кӣ ва бо чӣ ҳадафе ба Тоҷикистон сафар кардааст.
Аз чеҳраҳои шинохтаи Русия Хасбик аввалин нафаре нест, ки дар соли ҷорӣ ба Тоҷикистон меояд. Пештар аз ӯ каҳрамони муҳорибаҳои омехтаи “UFC” Ислом Махачеви доғистонӣ ҳамчун меҳмон дар мусобиқаи ҷудои “Гран- прии Душанбе” ширкат карда буд.
Инчунин блогери рус Карина Кросс, ки дар Instagram 10,4 миллион дунболкунанда дорад, барои иштирок дар чанд маҳфиле, ки “Русский Дом” дар Душанбе ташкил кард, омада буд.
Пештар аз ҳама дар моҳи апрели соли ҷорӣ бо даъвати Исмоили Маҳмадзоҳир, набераи раисҷумҳури кишвар ва раиси Федератсияи ҷудо блогери озаритабор Ҳусейн Ҳасанов ба Тоҷикистон омада буд. Ҳусейн Ҳасановро дар Тоҷикистон дар сатҳи як президент пешвоз гирифтанд, ки вокуниши корбарон ва мардумро ба бор оварда буд.
