Вазорати корҳои дохилӣ имрӯз 9 июн аз як ҷинояти одамкушӣ дар бозори “Саховат”-и шаҳри Кӯлоб хабар дод. Дар хабари вазорат омада, ки як ҷавони 32-солаи сокини шаҳри Кӯлоб як ҷавони 25-соларо дар рӯзи равшан тахминан соати 15 баъди зуҳр дар дохили бозор бо корд зарба задааст, ки дуюмӣ дар натиҷаи зарби корд ҳалок шудааст.
Марди 32-сола рӯзи 7-уми июни соли 2021, тахминан соати 15:20-дақиқа, дар бозори “Саховат”-и шаҳри Кӯлоб бо ҷавони 25-солаи сокини шаҳри мазкур бинобар сабабе, ки гумонбаршаванда аз ҷабрдида маблағи пулӣ қарздор будааст, аз номбурда баргардонидани маблағи пулиашро талаб кардааст. Сипас, онҳо байни ҳамдигар ҷангу ҷанҷол карда, гумонбаршаванда бо корд 1-маротиба ба тарафи чапи қафаси синаи ҷабрдида задааст.
Дар натиҷа, ҷавони 25-сола ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст, омадааст дар хабари ВКД-и Тоҷикистон.
Гуфта мешавад, нисбати гумонбаршаванда парвандаи ҷиноятӣ бо моддаи 104 қисми 1 Кодекси ҷиноятии Ҷумҳурии Тоҷикистон оғоз карда шуда, тафтишот идома дорад.
