Рӯзи 29 декабр Воҳид Субонқулов шаҳранди 24 солаи Тоҷикистонро Додгоҳи шаҳри Маскав ба 11 соли зиндони низомаш сангин маҳкум кардааст.
Бино ба навиштаи хабаргузории “Бомдод”, додгоҳ Субонқуловро дар узвият дар дастаи мусаллаҳ, ғоратгарӣ ва ғайриқонунӣ нигоҳ доштани силоҳ гунаҳкор шинохтааст.
Додситонии Маскав гуфтааст, Субонқулов дар ҷараёни тафтишот барои ҳамкорӣ бо муфаттишон розӣ шудааст ва бо ӯ қарордоди ҳамкорӣ баста шуд. Ба ин далел, додгоҳ парвандаи Субонқуловро алоҳида аз айбдоршавандагони дигар муҳокима кардааст.
Тафтишот муайян намудааст, ки Субонқулов узви дастае будааст, ки дар атрофи бозори «Люблино» (Маркази тиҷоративу намоишии «Москва» кор мекард ва ба онҳое ҳамла мекард, ки аз ин бозор маблағҳои бузургро берун мебурданд. Аъзои ин даста бо силоҳи оташфишон ва болғаву табар мусаллаҳ шуда, бо мошинҳои «Ауди А6» ва Мерседес-Бенз Е 280 мегаштанд.
Бино ба далелҳои интишоргардида аъзоёни гуруҳ моҳи ноябри соли 2018 дар назди бозори «Люблино» ба нафаре ҳамла оварданд, ки бо худ 59 ҳазор доллар доштааст, онҳо соҳиби пулро бо 4 тир захми намуда, маблағҳояшро ба яғмо бурданд.
Ҳамчунин дар идома гуфта шудааст, ки моҳи декабри соли 2018, аъзоёни гуруҳ ба ду марде ҳамла карданд, ки дар мошинашон 13 миллион рубл доштанд. Дар натиҷаи ин ҳамла яке аз ҷабрдидаҳо ҷароҳат бардошт ва ғоратгарон 13 миллионро гирифта, аз ҷои ҳодиса фирор карданд.
