Бино ба иттилои хабаргузории “KP.ru” рӯзи 27 январ дар саҳни ятимхонаи “Павлин” воқеъ дар наздикии боғи “Дубки”-и шаҳри Маскав назди айвони ин муассиса тифли 3-моҳаи дар кампал (одеяло) парпечбастаро пайдо кардаанд, ки модараш гузошта рафтааст.
Гуфта мешавад, ин тифл ба як ҷавонзани 22-сола бо номи Фирӯзахон аз Тоҷикистон таалуқ доштааст, ки чанде пеш ба хотири супоридани фарзандаш ба ятимхона омада будааст, вале дар ятимхона тифли навзодро ба хотири хурдсол буданаш қабул накардаанд.
Модари тифл бо гиря ба кормандони пулис изҳор дошта, ки чанде пеш ба ин ҷо омада, ба раҳбарияти ятимхона рӯирост гуфтааст, ки тифлашро ба онҳо додан мехоҳад, зеро хушдори наваш кӯдакро қабул надорад.
Ҳамчунин аз хадамоти матбуоти прокуратураи Маскав дар ин маврид хабар дода шуд, ки “айни замон кӯдак дар бемористон қарор дошта, табибон вазъи солимии ӯро муоина мекунанд. Сабаб ва ҳолатҳои ин ҳодиса таҳқиқ ва то кадом андоза риоя шудани талаботи қонунгузорӣ дар бораи муносибат бо ноболиғон, инчунин амали волидон оид ба иҷрои уҳдадориҳояшон дар ғамхорӣ дар бораи солимӣ ва инкишофи кӯдак арзёбӣ мешавад”.
Дар идома гуфта шудааст, ки то ҳол дар ин маврид парвандаи ҷиноятӣ оғоз нагардидааст, дар ҳолати солим будани тифл, эҳтимол барои дар хатар гузоштани кӯдак парванда оғоз гардад, ки тибқи қонунгузории Русия то як соли зиндон ҷазо пешбинӣ шудааст.
Аммо агар кӯдак бемору лоғар бошад ва маълум шавад, ки модараш бо ӯ рафтори муносиб надоштааст, пас инро иҷро нашудани уҳдадориҳо оид ба тарбияи ноболиғ баҳогузорӣ карда, ҷазо сахттар мешавад, яъне то се соли зиндон дар назар аст.
