Ба онҳое, ки дар доираи парвандаи омода кардани суиқасд ба ҷони президенти Белорус Александр Лукашенко ва табаддулоти ҳарбӣ боздошт шудаанд, 12 соли зиндон таҳдид мекунад. Дар ин бора ба расонаҳо Константин Бичек, сардори шӯъбаи тафтишоти КГБ-и Белорус хабар дод.
Дар робита ба ин қазия бо моддаи 357 Кодекси ҷиноятии Ҷумҳурии Беларус парвандаи ҷиноӣ оғоз карда шудааст. Бичек ҳамчунин қайд кард, ки дар таърихи Белоруси соҳибистиқлол чунин ҳолат ба қайд гирифта нашуда буд.
Ёдовар мешавем, ки рӯзи шанбе Александр Лукашенко аз боздошти гурӯҳе хабар дод, ки гӯё нақшаи суиқасд ба ҷони ӯ ва фарзандонашро омода мекардаанд. Ба гуфтаи ӯ, дар ин кор хадамоти махсуси ИМА даст доштааст. Ҳамзамон ба ин гурӯҳ ҳам шаҳрвандони Белорус ва ҳам хориҷиёне шомил буданд, ки тибқи изҳороти КГБ-и Белорус илова бар ҷисман аз байн бурдани Лукашенко ва аъзои оилаи ӯ, гӯё мехостаанд як исёни мусаллаҳона ташкил намуда, ҳокимиятро бо роҳи зӯрӣ ба даст оранд.
Бино ба иттилои маркази робита бо ҷомеаи ФСБ-и Русия, дар пайи боздошти ин гурӯҳ ҳамчунин дар Маскав адвокат Юрий Зенкович, ки душаҳрвандии Иёлоти ИМА ва Беларусро дорад ва сиёсатшиноси Белорус Александр Федута боздошт шудаанд. Хадамоти амнияти федеролии Русия бо нашри наворе хабар додааст, ки онҳо нақшаи қатли Александр Лукашенкоро доштанд ва ин нақшаи худро бояд рӯзи 9-уми май ҳангоми таҷлили ҷашни “Ғалаба” амалӣ мекарданд.
Дар ин нақша гӯё онҳоро “як генерал” низ ҳамроҳӣ мекардааст, вале аз ӯ ном бурда намешавад. Дар робита ба ин қазия ҳамчунин раҳбари ҳизби мухолифин Григорий Костусев дар қаламрави Белорус боздошт шуд.
Дар вокуниш ба гуфтаҳои Лукашенко, намояндаи расмии Департаменти давлатии Амрико ба расонаҳо гуфт, ки Иёлоти Муттаҳида дар ягон тавтеаи барканории президенти Белорус Александр Лукашенко даст надорад.
