Як ҳайат аз хабарнигорони ширкати Телевизион ва радиои миллии Узбекистон имрӯз 17 май ба Тоҷикистон ташриф меорад. Онҳо қасд доранд, ки дар бораи дӯстии Тоҷикистон ва Узбекистон як силсила гузоришҳо омода кунанд.
Хабаргузории “Азия Плюс” ба нақл аз “Ҷамъияти узбекон” навишта, ки ин ҳайат тасмим дорад, ки як силсила гузоришҳоро омода кунад, ки баъдан тавассути 12 шабакаи телевизионӣ ва 4 канали радиои Узбекистон пахш карда мешаванд.
Гуфта мешавад, зарфи як ҳафтае, ки ин хабарнигорони Узбекистони дар Тоҷикистон ҳастанд аз шаҳрҳои Душанбе, Турсунзода ва минтақаҳои Спитамен дидан мекунанд.
Дар Душанбе, аз ҷумла онҳо аз боғи фарҳангу фароғатии Алишер Навоӣ дидан хоҳанд кард.
Дар Кохи Борбад бо ҳамкасбони худ мулоқот хоҳанд намуд. Ҳамчунин аз оилаҳои тоҷику узбек низ дидан менамоянд.
Дар мавриди дастовардҳои деҳконони Турсунзода гузоришҳо омода мекунанд.
Инчунин аз бемористони Қубодиён ва як мактаб дар ноҳияи Спитамен, ки бо маблағи Узбекистон сохта шудааст дидан менамояд.
Ин ҳайати хабарнигорони узбек ҳамчунин тасмим доранд бо шахсиятҳои маъруфи Тоҷикистон низ дидору мулоқот анҷом диҳанд.
