Эмомалӣ Раҳмон дар сафари корияш ба ВМКБ, ки аз рӯзҳои 27 то 30-уми сентябр идома кард, як қатор бинову иншооти муҳим барои мардумро дар ин вилоят ифтитоҳ кард.
Ҳамзамон 28-уми сентябр Эмомалӣ Раҳмон дар ноҳияи Роштқалъа шабакаи оби нӯшокӣ, ки ба 171 хоҷагии шаҳраки Медони деҳоти “Роштқалъа” обрасонӣ мекунад ва як ҳоҷатхонаеро ҳам муассисаи таълимие дар ин ноҳия ба истифода дод.
Гуфта мешавад, таъмини оби нӯшиданӣ дар Роштқалъа ва бунёди ҳоҷатхонаҳо дар он муссисаи таълимӣ тиқби Лоиҳаи муштараки “Шукуфоии Тоҷикистон”-и Фонди Оқохон (AKF) ва Оҷонсии Иёлоти Муттаҳидаи Амрико барои рушди байналмиллалӣ (USAID) сохта шудаанд.
Аммо дар хабари Дафтари матбуоти Президент аз саҳмдорони асосӣ ном бурда нашудааст, танҳо номи “Агентии Оқохон” зикр мешавад. Бештар ин дастовард ба номи ҳукумат ва Президент рабт дода шудааст. “Бо дастгирии Ҳукумати Ҷумҳурии Тоҷикистон ва Агентии Оқохон оид ба макони зист дар Ҷумҳурии Тоҷикистон бо харҷи беш аз 2 миллиону 400 ҳазор сомонӣ татбиқ шудааст”, – омадааст дар хабари дафтари матбуоти Президент.
Хабари ифтитоҳи хоҷатхонаҳо баҳси гармеро дар шабакаи иҷтимоии Фейсбук ба бор овардааст. Иштироки Президент дар ифтитоҳи ҳоҷатхона дар як муассисаи таълимиро баъзе корбарон ба инҳисори тамоми соҳаҳои кишвар аз тарафи як шахс рабт медиҳанд. Баъзе гуфтаанд, “ҷои шарм ва ҳам хандаовар аст, ки ҳатто як хоҷатхонаро бояд ӯ ифтитоҳ кунад”.
