Агентии авиатсияи граждании Тоҷикистон аз ширкатҳои ҳавопаймоии Русия ва ватанӣ хостааст, ки нархи билети ҳавопайморо коҳиш диҳанд. Дар ин бора ба рӯзноманигорон Икром Субҳонзода, раиси Агентӣ зимни нишасти матбуотӣ хабар дод.
Субҳонзода мегӯяд, ин ниҳод мухолифи болоравии беасоси нархи чиптаҳои ҳавопаймоӣ буда, аз ширкатҳои ҳавопаймоие, ки ба Русия парвоз мекунанд, даъват кардааст, ки нархи чиптаҳоро поин оранд.
Ба гуфтаи ӯ ниҳодаш, ки соҳаи авиатсияи гражданиро назорат мекунад, дар ин масъала канор намемонад ва чанде пеш бо иштироки ширкатҳои ҳавопаймоӣ барои ҳалли ин масъала ҷаласаи изтирорӣ ташкил намуда буд.
“Дар ин самт кор идома дорад ва аллакай натиҷаҳое ба даст омадаанд, ки нархи чиптаҳо поин рафта истодааст. Мо катъиян таъкид мекунем, ки нархи чиптахо бояд дар доираи хароҷоти дар ин хатсайрхо сарфшуда бошад. Ширкатҳои ҳавопаймоӣ огоҳ карда шуда, ба онҳо расман мактуб пешниҳод шудааст, то нархҳоро беасос баланд накунанд. Мо бешубҳа ҳуқуқи мусофиронамонро ҳимоя хоҳем кард”, – гуфт ӯ.
Ёдовар мешавем, ки пас аз 1-уми январи соли 2022 арзиши парвозҳо аз Тоҷикистон ба Русия беш аз ду баробар боло рафт. Ба ин тартиб, тибқи тарофаҳои феълии ширкатҳои ҳавопаймоӣ, як чиптаи парвоз аз Душанбе ба Маскав беш аз 5 ҳазор сомонӣ арзиш дорад, дар ҳоле, ки дар моҳи декабр онро бо нархи 2,4 ҳазор сомонӣ дарёфт карда мешуд.
