Бомдоди имрӯз ба вақти Теҳрон раҳбари сиёсии Ҳаракати муқовимати исломии Фаластин (ҲАМОС) дар Теҳрон кушта шуд.
Бино ба иттилои расмӣ, бомдоди рӯзи 31-уми июли соли 2024, Сипоҳи посдорони Инқилоби Ҷумҳурии исломии Эрон эълон кард, ки Исмоил Ҳания, раҳбари сиёсии ҲАМОС дар пойтахти Эрон кушта шуд.
Дар баёния Сипоҳи посдорони Эрон гуфта шуда, ки “бомдоди имрӯз маҳалли иқомати ҷаноби оқои дуктур Исмоил Ҳания, раиси дафтари сиёсии муқовамати исломии Ҳамос дар Теҳрон мавриди исобат қарор гирифта ва дар пайи ин ҳодиса ишон ва як нафар аз муҳофизинаш ба шаҳодат расиданд.”
Сипас ҲАМОС ҳам бо таъйиди ин хабар эълон кард, ки “раҳбари муҷоҳиди ин ҳаракат шаҳид Исмоил Ҳания пас аз ширкат дар маросими савангандёдкунии раисҷумҳури ҷадиди Эрон бар асари ҳамлаи исроилиҳо дар маҳалли иқоматаш дар Теҳрон ба шаҳодат расид.”
Маҳмуд Аббос, раиси ташкилоти худгардони Фаластин ҳам гуфта, ки “террори Исмоил Ҳания, раҳбари сиёсии ҲАМОС “як иқдоми буздилона будааст.” Инчунин Мӯсо Абӯмарзуқ ҳам аз раҳбарони ин ҳаракат ба расонаҳо террорри раҳбари сиёсии ин ҳаракатро “амали буздилона” хонд ва таъкид кард, ки “ин кор бепосух намемонад.”
Шабакаи Аларабия ҳам дар шарҳи ин хабар гуфтааст, ки маҳалли иқомати раҳбари сиёсии Ҳаракати муқовимати исломии Фаластин аз роҳи дур тавассути мушак мавриди ҳадаф қарор гирифтааст.
Аз сӯи дигар, вазири мероси фарҳангии Исроил ҳам дар вокуниш ба ин хабар гуфтааст, ки пас аз кушта шудани Исмоил Ҳания, раҳбари ҲАМОС ҷаҳони хубтаре хоҳем дошт.
Мақомоти амниятии Исроил ҳам эълон кардаанд, ки ин кишвар ҳарими ҳавоии худро аз хатти “хадро” то шимоли Исроил баста эълон мекунад.
Мақомоти Эрон эълон кардаанд, ки дар робита ба ин ҳодиса парванда боз кардаанд ва ҷузъиёти он баъд аз анҷоми таҳқиқот нашр хоҳад шуд.
Ба иттилои расонаҳо, дар рафти ҷангҳои ахир байни фаластиниҳо дар навори Ғазза ва Исроил зиёда 70 нафар аз аъзои хонавода ва наздикону пайвандони Исмоил Ҳаниа аз ҷониби Исроил кушта шуда буданд.
Гуфта мешавад, Исмоил Ҳания, раҳбари сиёсии ҲАМОС солҳои ахир хориҷ аз Фаластин дар давлати Қатар зиндагӣ мекард. Аммо ҳодисаи қатли ӯ дар Теҳрон, пойтахти Эрон, он ҳам дар назустин рӯзи кории президенти ҷадиди ин кишвар вокунишҳои зиёдеро дар дохили Эрон ва берун аз он ба бор овардааст.
Исмоил Ҳания, раҳбари сиёсии ҲАМОС 29-уми январи соли 1962 дар урдугоҳи аш-Шотӣ дар навори Ғазза ба дунё омада буд. Соли 2006 Нахуствазири ташкилоти худгардони Фаластин интихоб шуд. Баъд аз чанд муддат ӯро аз қудрат барканор карданд. Сипас аз Ромулло ба Ғазза рафта, идораи умури Ғаззаро ба уҳда гирифт. Вай соли 2017 раиси Дафтари сиёсии ҲАМОС интихоб шуд.
