Дар Тоҷикистон истиҳесоли беш аз 17 намуд мошинҳои ҳарбӣ, аз он ҷумла нафарбарҳои низомӣ ва нақлиёти хусусиро ба роҳ мондаанд.
Бино ба иттилои расмӣ, субҳи имрӯз, 24-уми майи соли 2023 корхонаи ҷамъу васли нақлиёти ҳарбӣ ва хусусие бо номи ҶДММ “Сипар гурӯҳ” дар шаҳри Турсунзода мавриди баҳрабардорӣ қарор дода шуд.
Хадамоти матбуоти Президенти Тоҷикистон мегӯяд, корхонаи “Сипар гурӯҳ” дар доираи “Солҳои рушди саноат”, 2022 – 2026 ва татбиқи ҳадафҳои “Барномаи давлатии рушди комплекси нақлиёти Ҷумҳурии Тоҷикистон барои соли 2025” сохта шуда, самти фаъолияти асосии он ба ҷамъу васлсозии мошинҳои махсуси ҳарбӣ ва гражданӣ равона гардидааст.
Ба қавли манбаъ, корхонаи мазкур дар ҳамкорӣ бо шарикони рушд бунёд ёфта, “дар марҳилаи аввал бо ворид намудани қисмҳои алоҳида аз хориҷи кишвар ҷамъу васли 17 намуд нақлиёти махсус ба роҳ монда шудааст ва оянда ин нишондод афзоиш дода мешавад.”
Гуфта мешавад, дар ин корхона қисмҳои алоҳида барои омода намудани мошинҳои махсуси ҳарбӣ ва маданӣ асосан аз Ширкати «STREIT GROUP» -и Имороти Муттаҳидаи Араб дастрас мегардад ва дар марҳилаи нахуст иқтидори солонаи он “ҷамъу васли 120 нақлиёт мебошад.”
