Иттиҳоди Аврупо ва Тоҷикистон ду созишномаеро баррасӣ карданд, ки тибқи онҳо Тоҷикистон 29 миллион евро кукам дарёфт хоҳад кард.
Бино ба иттилои АМИТ “Ховар“, имрӯз, 18-уми ноябри соли 2022 дар шаҳри Самарқанд Далер Ҷумъа, вазири энергетика ва оби Тоҷикистон ҳамроҳ бо муовини директори генералии Мудирияти генералии шарикии байналмилалӣ (DGINTPA) Мариета Ягер мулоқот карданд.
Ба қавли манбаъ, дар ин дидор Далер Ҷумъа бо Мариета Ягер бандҳои ду созишномаеро дар соҳаи энергетика ва об мавриди баррасӣ қарор доданд.
Дар ин хабар таъкид мешавад, ки “ин созишномаҳо на фақат аҳамияти миллӣ, балки аҳамияти минтақавӣ низ доранд. Дар доираи ин созишномаҳо Тоҷикистон ҳамкорӣ бо дигар кишварҳоро низ рушд медиҳад.”
Гуфта мешавад: “Созишномаи якум ба кумаки техникӣ равона гардидааст, ки Ҷумҳурии Тоҷикистон пайваста ислоҳоти соҳаи энергетикаро мегузаронад. Маблағи кумаки техникӣ 15 млн евроро дар бар мегирад. Созишномаи дуюм ба соҳаи об нигаронида шудааст, ки маблағи он 14 млн евроро ташкил медиҳад”.
