Ҳукумати Тоҷикистон бо раҳбарии Эмомалӣ Раҳмон барои дифоъ аз худ намояндаҳои ҳизби ҳоким, Академияи миллии илмҳои Тоҷикистон ва бархе зиёинро ба по хезондаанд.
Бино ба иттилои расмӣ, 13-уми сентябри соли 2023, Хайринисо Юсуфӣ, муовини Эмомалӣ Раҳмон дар Ҳизби халқӣ-демократии Тоҷикистон бо нашри як матлаб, ки АМИТ “Ховар” онро нашр кардааст, муаллифи китоби Ҳаводиси рӯзгори ман”-ро “душмани хонагӣ” хондааст.
Муовини Ҳизби халқӣ-демократии Тоҷикистон бо тамоми тавони худ талош карда, аз ҳукумат ва бахусус раиси он Эмомалӣ Раҳмон дифоъ намояд, ва ӯро “сиёсатмадоре аз навъи хос ” унвон карда, таъкид намудааст, ки вай “муваффақ ва беназир мебошад.”
Хонум Хайринисо Юсуфӣ, ки ба назар мерасад дар вақти навиштани ин матлаб хеле ба эҳсосот дода шуда аст, ӯро бештар аз ҳама дар ин китоб ду ҷумлаи муаллиф, ки гуфтааст: “Яке аз сабабҳои асосии ҳарҷу марҷ дар кишвар парокандагии миллат аст, давлат гӯё ин мушкилро дарк карда, шиорҳоеро аз қабили “Ваҳдат асоси субот аст” ва амсоли инҳо рӯи даст гирифтааст. Вале дар асли ҳол ваҳдати миллӣ танҳо бо ҳамин шиорҳо хатм мешавад ва ба воқеият табдил нашудааст”, сахт нороҳат кардааст.
Пеш аз ин сафири Тоҷикистон дар Узбекистон Абдуҷаббор Раҳмонзода, ки ҳамзамон узви Иттифоқи нависандагони Тоҷикистон низ мебошад ва Эмомалӣ Насриддинзода, узви вобастаи Академияи миллии илмҳои Тоҷикистон низ бо нашри матлабҳои ҳамсоне аз ҳамин нуктаи Абдухалил Холиқзода сахт интиқод карда буданд.
Гуфта мешавад, китоби “Ҳаводиси рӯзгори ман” марти соли ҷорӣ ҳам дар Теҳрон ва ҳам дар Душанбе чоп ва ба дасти хонанда расид. Се моҳ баъд аз нашри он иддае аз кормандони Вазорати фарҳанг ба он вокуниш карда, сару садоҳоеро дар шабакаҳои иҷтимоӣ ба роҳ андохтанд. Сипас Додситони кулли Тоҷикистон Юсуф Раҳмон вориди қазия шуд. Бо супориши ӯ Абдухалил Холиқзода, муаллиф ва баъд аз он Абдуқодир Рустам, муҳаррири китоби мазкур низ бо иттиҳоми барангехтани кинаву адовати миллӣ ва ғайра боздошт шуданд.
Дар давоми баҳсу ҷанҷолҳое, ки тайи беш аз се моҳи ахир дар бораи нашри ин китоб дар расонаҳо ва шабакаҳои иҷтимоӣ идома дорад, хонум Хайринисо Юсуфӣ болотарин мақоми ҳизби ҳоким ва дар айни замон аз ҳамшаҳриҳои муаллифи китоби “Ҳаводиси рӯзгори ман” аст, ки хеле сахт алайҳи Абдухалил Холиқзода тохтааст.
Ба гуфтаи огоҳон, зоҳиран аз вокуниши мақомдорони кишвар бармеояд, ки баъзеашон мақсади муаллифро дуруст дарк накардаанд ва ё калимотро нафаҳмидаанд, аз ҷумла маълум аст, ки аксарашон “ҳарҷ”-ро аз “харҷ” фарқ накарда, чунин вокуниши тунд кардаанд.
