Президенти Тоҷикистон, ки пас аз баргузории нишастҳои Шӯрони Сарони кишварҳои узви Созмони Ҳамкориҳои Шанхай ба муддати 10 рӯз бедарак буд, имрӯз худ дарак дод.
Бино ба иттилои Хадамоти матбуоти Президенти Тоҷикистон, субҳи имрӯз, 27-уми сентябри соли 2022 Эмомалӣ Раҳмон ба Владимир Путин “барқияи изҳори тасаллӣ” фиристод.
Дар ин барқияи изҳори ҳамдардии Эмомалӣ Раҳмон омадааст:
“Муҳтарам Владимир Владимирович, Хабари фоҷеабори ҳамлаи ғайриинсонии мусаллаҳонаро дар яке аз мактабҳои шаҳри Ижевск, ки муҷиби ба ҳалокат расидан ва ҷароҳати вазнин бардоштани даҳҳо нафар кӯдакон ва шаҳрвандони болиғи Федератсияи Русия гардид, бо андӯҳи амиқ дарёфтам.”
Эмомалӣ Раҳмон ба ҳамтои русияш таъкид мекунад: “Ба Шумо ва пайвандону наздикони фавтидагон таъзияву тасаллиёти самимии ин ҷонибро изҳор менамоям. Хоҳони шифои оҷили ҳамаи осебдидагон ҳастем.”
Ин изҳори тасаллии Эмомалӣ Раҳмон ба Владимир Путин дар ҳоле сурат гирифтааст, ки ҳанӯз аз кушта ва захмӣ шудани беш аз 150 нафар, аз ҷумла занону кӯдакони натанҳо мактабхон, балки ширхӯр ва дар батни модар ва ҳанӯз ба дунё наомада, ки дар ҳодисаҳои назди марзӣ ҷон бохтану захмӣ гардиданд, 10 рӯз нагузаштааст. Вале Эмомалӣ Раҳмон расман ва аз тариқи расонаҳо ба онҳо ҳеч изҳори ҳамдардие накардааст.
Гуфта мешавад, дар таркиши мактабе дар шаҳри Ижевски Русия 17 нафар, аз ҷула 11 кӯдак кушта ва 23 тани дигар захмӣ шудааст, ки 21 нафари онҳоро низ ноболиғон ташкил медиҳанд.
