Муҳиддин Кабирӣ, раиси Ҳизби наҳзати исломии Тоҷикистон мегӯяд, ҳечгоҳ ҳизбаш дар таомулоти сиёсии кишварҳои Русия, Эрон ва Тоҷикистон нақши қурбонро намепазирад.
Раиси ҲНИТ рӯзи 17-уми сентябр бо интишори паёме дар ҳисоби тивиттериаш навишт, ки Русия Наҳзатро террористӣ эълон кард ва як рӯз пас аз он Эрон узви доимии Шанхай шуд, вале ба амалкарди Русия ҳеч вокунише нишон надод.
“Як рӯз қабл аз нишасти Шонгҳой Русия Наҳзати исломии Тоҷикистонро террорист эълон кард. Ҳамон рӯз Эрон расман узви ин созмон шуд ва ҳеч вокунише ба иқдоми шарики стротежики худ нишон надод.”, менависад Кабирӣ.
Ӯ дар идома афзуда, ки “Наҳзат ҳечгоҳ нақши қурбониро дар ин таомулот намепазирад, балки муборизаро бо шинохт ва воқеиятҳои нав, ҷиддитар идома хоҳад дод.“
Вокуниши Кабирӣ ба хомушии давлати Эрон ҳамчун кишвари кафили сулҳи тоҷикон дар ҳолест, ки Русия 14-уми сентябри соли ҷорӣ бо талаби мақомоти Тоҷикистон ҲНИТ-ро дар қаламрави худ “ташкилоти террористӣ” эътироф кард.
Раҳбаиятри ҲНИТ таъкид мекунад, ки бо вуҷуди он ки ин ҳизб дар Русия фаъолият надорад, вале террористӣ эътироф шудани он дар ин кишвар мушкилоти бе ин ҳам зиёди муҳоҷирони тоҷикро даҳчанд хоҳад кард. Ва минбаъд дилхоҳ муҳоҷир метавонад бо иттиҳоми ҷонибдорӣ аз ин ҳизб зиндонӣ шавад.
