Аваз Кабиров, молики бозори “Султони Кабир” мегӯяд, мақомот ӯро барои тахриб кардани бозораш расман огоҳ накардаанд ва дар ин маврид аз расонаҳо огоҳ шудааст.
Кабиров дар суҳбате бо “Asia-plus” гуфт, агар мақомот дар ҳақиқат бозорро тахриб кардан хоҳанд, омодааст, ки бо соҳибкорон машварат намуда, бозорро холӣ кунанд.
Ӯ мегӯяд: “Агар сад бозор низ тахриб шавад, мо ҳеҷ гоҳ ба ҳукумат мухолифат намекунем. Мо тарафдори ободии шаҳр ҳастем. То имрӯз тамоми дастуру супоришҳои сарвари давлатро иҷро кардем ва ин корро низ анҷом медиҳем. Мардум барои сулҳу субот дар кишвар ҷони худро фидо карданд. Мо тайёрем, ки на танхо бозорро барои тахриб диҳем, балки агар лозим шавад, барои ободии Ватан ҷонамонро низ фидо мекунем.”
Ба иддаои молики бозори “Султони Кабир” дар ин бозор беш аз 1500 соҳибкор машғули тиҷорат ҳастанд, ки ҳар савдогар бо худ 3-4 ёрдамчӣ дорад ва дар маҷмуъ дар бозор беш аз 5 ҳазор нафар кор мекунанд.
Бо қарори ахири шаҳрдори Душанбе Рустами Эмомалӣ, ки 24-уми ноябр нашр шуд, бозори “Султони Кабир” – яке аз бузургтарин бозорҳои шаҳри Душанбе, ки дар он масолеҳи сохтмонӣ фурӯхта мешавад, аз 1-уми марти соли 2022 баста мешавад.
Дар боробарои он Ҷамъияти дорои масъулияти маҳдуди “Файзи Саид”-“Осиё” ва гирду атрофи он дар ноҳияи Фирдавсӣ, ҳамчунин маркази савдои “Мадад” дар кӯчаи А. Ҷомии ноҳияи Сино низ тахриб мешаванд.
Бозори “Султони Кабир” яке аз бузургтарин бозорҳои Душанбе буда, дар кӯчаи Неъмат Қарабоев ҷойгир аст ва он соли 2000 сохта шудааст.
Дар гузашта тахриби бозорҳо, ба монанди бозори Турсунзода, бозори “Ином” дар Шаҳритус, бозори “Ҷалҷам”, бозори Шоҳмансур ва ғайра тахриб ва ба ҷойҳои дигар кӯчонида шуданд. Дар аксар ҳолатҳо ин бозорҳо аз ҷониби наздикони Президент аз дасти соҳибони аслияшон гирифта шудаанд.
