Вазири тандурустӣ ва ҳифзи иҷтимоии аҳолии Тоҷикистон мегӯяд, ки дар ҳоли ҳозир дар муассисаҳои тиббӣ 382 мошини ёрии таъҷилии тиббӣ намерасад.
Имрӯз, 27-уми июли соли 2022, Ҷамолиддин Абдуллозода, Вазири тандурустӣ ва ҳифзи иҷтимоии аҳолии Тоҷикистон дар посух ба хабарнигорон гуфт, айни замон дар муассисаҳои тиббии кишвар 748 мошини ёрии таъҷилии тиббӣ ба қайд гирифта шудааст, ки 160 адади онҳо таъмирталаб ҳастанд.
Ба қавли Вазири тандурустӣ ва ҳифзи иҷтимоии аҳолии Тоҷикистон 588 мошини ёрии таъҷилие, ки дар муассисаҳои тиббии кишвар хидматрасонӣ мекунанд, 58% талаботи кишварро ташкил медиҳанд ва дар ҳолати аз таъмир хориҷ шудани 160 адади дигари онҳо боз ҳам 382 мошини ёрии таъҷилии тиббӣ намерасад.
Ба таъкиди Ҷамолиддин Абдуллозода, “имрӯз агар дар Тоҷикистон 10 миллион аҳолӣ вуҷуд дошта бошад, бояд як миллион мошини ёрии таъҷилӣ хидматрасонӣ кунад.”
Гуфтанист, раҳбарияти Вазорати тандурустӣ умедвора аст, ки агар мисли ду соли гузашта, ки 196 адад мошинҳои ёрии таъҷилӣ ба муассисаҳои тиббии кишвар тақсим карда шуд, ин раванд дар солҳои оянда низ идома ёбад, мушкили норасоии мошинҳои ёрии таъҷилӣ бартараф хоҳад шуд.
