Қарзи Афғонистон аз кишварҳои ҳамсоя барои нерӯи барқ тақрибан ба 62 миллион доллар расидааст.
Дар ин бора рӯзи Душанбе шабакаи телевизионии “ToloNews” бо такя ба изҳороти ширкати “Брешно”-и Афғонистон иттилоъ дод.
Дар хабар гуфта мешавад, ки ширкати “Брешно”-и Афғонистон ба кишварҳои ҳамсояи содиркунандаи барқ - Узбекистон, Тоҷикистон, Туркманистон ва Эрон нома фиристода ваъда додааст, ки қарзро пардохт мекунанд ва аз онҳо хостааст, ки барқро хомӯш накунанд.
Ҳамчунин ин ширкат ба Миссияи кӯмаки СММ дар Афғонистон муроҷиат кардааст, то дар пардохти қарз ба онҳо кӯмак расонанд. Дар изҳороти ширкати “Брешно” қайд карда мешавад, ки дар сурати кӯмак пайдо накардан, ширкат маҷбур мешавад барои пардохти пул “ба афғонҳое фишор оварад, ки пули истифодаи барқи худро надодаанд, ҳатто агар имкон надоранд”.
Дар ҳамин ҳол масъулони “Барқи тоҷик” гуфтанд, ки ширкати “Брешно” ваъда додааст, ки қарзашро “баъди ба эътидол омадани низоми бонкӣ” дар Афғонистон мепардозад.
Дар суҳбат бо Радиои Озодӣ як намояндаи дафтари матбуоти “Барқи тоҷик” рӯзи 5-уми октябр гуфт, умедворанд, ки ҷониби Афғонистон пули барқро медиҳад ва “вобаста ба эҳтиром ва риояи иҷрои уҳдадориҳои байналмилалии худ, имрӯзҳо ҳар шабонарӯз ба Афғонистон, дар доираи талаботи истифодабарӣ, ба миқдори то 30 МВт нерӯи барқ интиқол дода мешавад”.
Ёдовар мешавем, рӯзи 29-уми июл Маҳмадумар Асозода, муовини аввали ширкати “Барқи тоҷик” зимни нишасти хабарӣ гуфта буд, ки дар шаш моҳи аввали имсол ба Афғонистон ба миқдори 457,9 миллион киловат соат барқ додаанд.
Бо ин ҳол, манбаъ нагуфтааст, ки ширкати “Брешно”-и Афғонистон аз Тоҷикистон чӣ қадар қарздор аст. Аммо гуфта мешавад Ширкати “Барқи тоҷик” як киловат барқро ба Афғонистон бо нархи 4,5 сент мефурӯшад.
