Бо вуҷуди қатъи нерӯи барқ дар 3 кишвари Осиёи Марказӣ, дар Тоҷикистон қатъи он мушоҳида нашудааст. Дар ин бора ба “РИА Новости” намояндаи ширкати “Барқи тоҷик” хабар дод.
Рӯзи 25-уми январ дар қисме аз манотиқи Узбекистон, Қазоқистон ва Қирғизистон барқ қатъ шудааст.
Вазорати энержии Узбекистон ба расонаҳо хабар дод, ки қатъи нерӯи барқ дар ин минтақа бар асари садамае, ки дар Қазоқистон рух дод, сар задааст. Ва ҳоло дар Тошканд вилоятҳои Фарғона ва Тошканд, водии Фарғона, вилоятҳои Сирдарё, Ҷиззах, Самарқанд, Навоӣ ва Қашқадарё барқ нест.
Инчунин дар шаҳрҳои Қазоқистон, аз қабили Алмаато, Талдиқӯрғон, Чимкент, Тарас, вилояти Туркистон ва ғайраҳо барқ қатъ шудааст.
Дар Қирғизистон қатъи барқ дар Бишкек, Ӯш ва дигар шаҳрҳо низ сабт гардидааст.
Ёдовар мешавем, ки ин се кишвар – Қазоқистон, Қирғизистон ва Узбекистон дар як ҳалқаи ягонаи энергетикии Осиёи Марказӣ муттаҳид шудаанд, ки ин лоиҳа ҳанӯз дар замони Шӯравӣ таҳия шуда буд.
Туркманистон соли 2003 ва Тоҷикистон соли 2009 аз ҳалқаи энергетикии ягона берун шуда буданд.
