Дар доираи ҳамкориҳои ҳукуматҳои ду кишвар, 100 дастгоҳи сайёри вентилятсияи сунъии шуш (IVL) “Кокчетав-4П”, ки дар Қазоқистон истеҳсол шудааст, ба Тоҷикистон супорида шуд. Дар ин бора хадамоти матбуоти Вазорати тандурустӣ ва ҳифзи иҷтимоии аҳолии Тоҷикистон хабар медиҳад.
Маросими супоридани таҷҳизот рӯзи шанбе баргузор шуд. Сафири фавқулодда ва мухтори Қазоқистон дар Тоҷикистон Аскар Тоҷибоев таҷҳизотро ба вазири тандурустӣ ва ҳифзи иҷтимоии Ҷумҳурии Тоҷикистон Ҷамолиддин Абдуллозода супурд.
“Тоҷикистон шарики боэътимод ва муттаҳиди Қазоқистон аст, ҳамкориҳои стратегӣ ва муносибатҳои ду кишвари бародар, ки ба дӯстӣ ва ҳамсоягии нек асос ёфтаанд босуръат рушд ва мустаҳкам мешаванд, аз ҷумла дар самти гуманитарӣ”, – таъкид дошт сафири Қазоқистон дар суханронии худ дар ин маросим.
Дар навбати худ, Ҷамолиддин Абдуллозода изҳори миннатдорӣ намуда, қайд кард, ки Тоҷикистон кумаки ҳукумати Ҷумҳурии Қазоқистон расонидашударо баланд қадрдонӣ мекунад.
Дастгоҳҳои Кокчетав-4П дар корхонаи “Тыныс” дар Кокшетау ҷамъоварӣ мешавад. Корхона дар як моҳ тақрибан 500 чунин дастгоҳ истеҳсол мекунад ва нархи як дастгоҳ 750 ҳазор тенга (1790 доллар) аст. Таҷҳизот мобилӣ буда, онро дар мошини ёрии таъҷилӣ насб кардан ё дар хона истифода бурдан мумкин аст.
Дастгоҳҳо дар доираи иҷрои фармони Президенти Қазоқистон Қосим-Жомарт Тоқаев ва қарори Ҳукумати Ҷумҳурии Қазоқистон аз 10 декабри соли 2020 “Дар бораи расонидани кумаки расмии башардӯстона” ба Тоҷикистон оварда шуданд.
