Ҳаҷми содироти филизоти қиматбаҳо дар Тоҷикистон дар нимсолаи аввали соли ҷорӣ нисбат ба ҳамин давраи соли 2021 41,2% коҳиш ёфтааст.
Тибқи оморҳои расмӣ Тоҷикистон аз фурӯши металлҳои қиматбаҳо беш аз 40,6 миллион доллар ё баробар ба 58,8%-и ҳамин давраи соли гузашта маблағ ба даст овардааст.
Дар моҳҳои январ-июни соли гузашта фурӯши металлҳои қиматбаҳо беш аз 69 миллион долларро ташкил додааст.
Бино ба иттилои Вазорати саноат ва технологияҳои нави Ҷумҳурии Тоҷикистон, дар кишвар 18 корхонаи истихроҷи тилло, ки қисме аз онҳо дар ихтиёри ширкатҳои чинӣ мебошад, фаъолият мекунад ва тавлиди ин метал ҳамасола афзоиш меёбад. Аммо Вазорати саноат бо баҳонаи махфӣ будани маълумот дар бораи истихроҷи металҳои қиматбаҳо, дар бораи ҳаҷми воқеии истихроҷи тилло чизе намегӯяд.
Гуфта мешавад, соли гузашта фурӯши металҳои қиматбаҳо 41,7 дарсади ҳаҷми умумии содироти кишварро ташкил додааст. Металҳои қиматбаҳо ба маблағи беш аз 896,6 миллион доллар фурӯхта шуданд, ки нисбат ба соли 2020 30% зиёд аст.
