Раиси Хадамоти зиддиинҳисории Тоҷикистон мегӯяд, гарон шудани билетҳои ҳавопаймо аз кишвар ба шаҳрҳои Русия ба онҳо вобаста нест.
Ба гузориши “Sputnik Тоҷикистон”, Абдулмаҷид Муминзод, раиси Хадамоти зиддиинҳисории Тоҷикистон мегӯяд, ки нархи билетҳои ҳавопаймоиро худи ширкатҳо дар асоси созишномаи байниҳукуматӣ муайян мекунанд.
Масъули Хадамоти зиддиинҳисории Тоҷикистон гуфта, ки “онҳо тариқи як мактуб хароҷоти ширкатҳоро ҳисобу пешниҳод карданд ва боқимонда бояд Агентии авиатсияи гражданӣ кор барад, ки чаро нархҳо якбора боло рафтанд.”
Аммо пештар Агентии авиатсияи гражданӣ хабар дода буд, ки ба ширкатҳо дастур додаанд, нархи билетҳоро арзон кунанд ва билети рафту баргашт набояд аз 500 доллар гаронтар бошад.
Дар ҳамин ҳол мусофироне, ки имрӯзҳо мехоҳанд билет бихаранд ва ба шаҳрҳои Русия сафар кунанд, мегӯянд, билет аз пештара хеле гарон шудааст ва ширкатҳо як билетро то 7 ҳазор сомонӣ ва аз он ҳам гаронтар мефурӯшанд.
