Шуморе аз масъулони Душанбе ва Бишкек дар бораи ҳамкориҳои дуҷониба ва таҳкими равобит дар пойтахти Тоҷикистон ба гуфтугӯ нишастанд.
Дирӯз, 22-юми августи соли 2022 вохурии муовини вазири корҳои хориҷии Тоҷикистон бо сафири фавқулъода ва мухтори Қирғизистон дар шаҳри Душанбе баргузор шуд.
Бино ба иттилои сомонаи Вазорати корҳои хориҷии Тоҷикистон дар мулоқоти Содиқ Имомӣ бо Эрлан Абдилдаев “масъалаҳои мубрами ҳамкориҳои дуҷониба дар соҳаҳои сиёсӣ, тиҷоратию иқтисодӣ, фарҳангию гуманитарӣ ва ғайра мавриди баррасӣ қарор гирифт.”
Ба қавли манбаъ, дар рафти мулоқот “ҷонибҳо доир ба ҳамкориҳои бисёрҷониба дар ҳошияи созмонҳои байналмилалӣ мубодилаи афкор намуданд.”
Гуфта мешавад, муносибатҳои дуҷонибаи Душанбеву Бишкек тайи ду соли ахир ба сабаби низоъҳои ба такрори марзӣ хеле сард шуда, Қирғизистон марзҳояшро ба рӯи Тоҷикистон бастааст.
Ба гуфтаи бархе коршиносон, яке аз иллатҳои асосии сард шудани равобити дуҷониба байни кишварҳо қочоқи маводи сӯхт, молу колоҳои тиҷоратӣ тавассути афроди вобаста ба хонавода ва домодҳои Эмомалӣ Раҳмон боиси нофаҳмиҳо ва ташдиди низоъҳо гардида буд, вале дар ин ду моҳи охир дидору мулоқотҳои масъулини боломақоми ду кишвар дар сатҳҳои мухталиф зиёдтар шуд, ки аз оғози фасли ҷадиде дар равобити ду кишвар дарак медиҳад.
