Бино ба иттилои Кумитаи ҳолатҳои фавқулодаи Тоҷикистон дирӯз 7-уми январи соли равон дар 80 километрии шоҳроҳи Душанбе-Хуҷанд–Чаноқ, мавзеъи Зимарғи ҷамоати деҳоти Анзоб як мошин ба ҷарии 400 метр сарозер шудааст. Дар натиҷаи ин ҳодиса 5 нафаре, ки дохили мошин будаанд, бо шумули ронанда ҳамагӣ ба ҳалокат расиданд.
Дар хабари Кумитаи фавқулода омада, ки мошини сарозершуда тамғаи “Opel Astra G” буда, аз ҷониби як марди 62-сола, сокини деҳаи Қалъаи Дӯстии ноҳияи Деваштич идора мешуд.
Ҳамаи ҳалокшудагон сокинони деҳаи Қалъаи Дӯстии ноҳияи Деваштич буда, хешу табори наздик будаанд ва ронанда ҳамсояи онҳо будааст. Бузургсолтарини онҳо ронанда ва хурдсолтарини онҳо Сайида ном духтарчаи ҳафтсола будааст.
Наҷотдиҳандагони ин ниҳод дар Вилояти Суғд ба макони ҳодиса ҳозир шуда бо ёрии таҷҳизоти гидравликӣ ҷасади ҳамаи қурбониёни ин садамаи маргборро аз умқи 400 метр берун оварданд.
Ба гуфтаи наҷотдиҳандагон ҳангоми баровардани ҷасадҳо яке аз онҳо зинда буд ва ӯро ба дастаи имдодрасони тиббӣ супурдаанд, аммо баъдтар ҷон бохтааст.
Кумита аз ронандагони ин роҳи пурхатар дархост намуданд, ки ҳангоми ҳаракат эҳтиёткор бошанд.
Аз баски Тоҷикистон маноитиқи кӯҳии бештар дорад, роҳҳои мушкилгузар ҳам зиёд дорад. Солона чандин мошинҳо дар чунин роҳҳо ба ҷарӣ сарозер мешаванд ва нафарони зиёд ба ҳалокат мерасанд.
Агарчи роҳи Душанбе – Хуҷанд – Чаноқ роҳи пулакӣ аст ва онро ширкати IRS – мутааллиқ ба наздикони раисҷумҳур идора мекунанд ва бояд бехатарии онро таъмин кунанд, аммо мутаассифона чунин минтақаҳои хавфнок солҳост, ки дуруст ва ҷавобгӯ ба меъёрҳои байналмиллалӣ сохта намешаванд.
