Дар шабакаи иҷтимоии фейсбук наворе нашр шуд, ки дида мешавад як гурӯҳи мусаллаҳи Толибон ба ноҳияи Моймайи Дарвози Афғонистон ҳамла мекунанд. Дар навор садои тоҷикони Тоҷикистон шунида мешавад, ки ба сокинони мусаллаҳи ин минтақа ҳамла доранду онҳоро тирборон намуда ба қатл мерасонанд.
Умед Ҷайҳонӣ, донишманди тоҷик дар саҳифаи фейсбукиаш менависад:
“Толибоне, ки бар Моймай дар Дарвоз тохт оварданд, тоҷик буданд. Дар миёнашон ду шаҳрванди Тоҷикистон ҳам ҳаст, ки яке Гадоев Басинбой аз ноҳияи Спитамен аст, ки худро Закариё номида ва дигаре Воҳидов Абдулбосит аз ноҳияи Рӯдакӣ аст, ки худро Юнус хондааст”.
Ҷайҳонӣ дар шарҳи ин навор менависад, ки “мо тоҷикҳо омодаем аз ҳаргуна андешаву идеулужие пайравиву пуштибонӣ кунем, ҷуз аз андешаи миллӣ ва идеулужии миллатгароӣ”.
Ҳамзамон Латиф Педром раҳбари Ҳизби кунгураи миллии Афғонистон ин ҳуҷуми Толибони тоҷикро сахт маҳкум карда мегӯяд:
“Моймай зодгоҳи ман аст. Ман филми ҷанги Моймайро тамошо кардам. Барои ман куштани як тоҷик аз дасти як тоҷики аз замини дигар ҷонгудозу ҷигарсӯз буд. Агар ин идда тоҷикон бо ҳар далиле наметавонанд оғуши муҳаббат ва бародарӣ ба сӯи мо боз кунанд, набояд даст ба қатлу куштори мо бизананд”.
Ӯ дар идома аз се узви Толибон, ки шаҳрвандони Тоҷикистон ҳастанд ном мебарад, ки ҳарсе бо духтарони ин минтақа хонадор шудаанд. “Мебоист ин тоҷикон тоҷикистонӣ поси хешовандиро медонистанд даст ба куштори бераҳмонаи ҳамтаборони дарвозии тоҷики худ дар ноҳияи Моймай намезаданд.”, менаисад Латиф Педром.
Ин намояндаи тоҷикони Афғонистон ба шиддат ин кушторро маҳкум карда менависад, “Ман ин амали ваҳшиёнаи тоҷикҳои омада аз Ҷумҳурии Тоҷикистонро бо шадидтарин алфоз маҳкум ва тақбеҳ мекунам”. Ҳамчунин Падром ба Толибони Дарвоз ҳушдор медиҳад, ки санҷида амал кунанд. Ва меафзояд, ки он чи дар навор дида мешавад, “на диндорона буд ва на аз ҷинси ҷанги озодибахш, ваҳшат дар ваҳшат буд”.
Ӯ дар хитоб ба Толибони Дарвоз мегӯяд: “Шумо чӣ гуна бар як бегона агарчи ҳамтабор ва ҳамхун бошад, иҷозат медиҳед ҳамсояи Шуморо дар деҳаатон ин гуна фаҷиъ ба қатл бирасонад. Ман садои омиронаи он тоҷикҳои он сӯи Омударёро шунидам, ки мегӯфтанд, бизанеду бикушед… Ин садоҳо ҷигархарош буд ва тавҷеҳнопазир.”
То ҳол дар бораи ҷузъиёти ин ҳамла расман аз ниҳодҳои марбута чизе нашр нашудааст. Чанде пеш хабарҳо нашр шуда буд, ки Толибон дар ноҳияи Моймайи Дарвози Афғонистон ҳаммарз бо Тоҷикистон қарор гирифтаанд.
Хабаргузории “Sputnik” аз як манбаъ дар мақомоти қудратии Тоҷикистон хабар дод, ки вобаста ва вазъияти ба амаломада дар Дарвозҳои Афғонистон, нерӯҳои амниятии Тоҷикистон вазъро таҳти назорат доранд ва ба ҷилавгирӣ аз ҳар иттифоқе омодаанд.
