Шавкат Мирзиёев, раисҷумҳури Узбекистон қонуни рушди саёҳӣ дар ин кишварро имзо намуд, ки бар асоси он ҳаракати автобусҳо байни шаҳрҳои Узбекистон ва Тоҷикистон барқарор мешаванд. Дар ин бора сомонаи “Сentralasia.media” аз қавли Маркази матбуоти президенти Узбекистон хабар дод.
Гуфта мешавад, ки ҳаракати автобусҳои мусофирбарӣ миёни Тошканд, Бухоро, Самарқанд ва Тирмиз бо шаҳрҳои Душанбе ва Хуҷанди Тоҷикистон дубора барқарор мешавад.
Ҳамчунин дар рӯзҳои наздик ҳаракати автобус миёни Узбекистон бо ҷануби Қирғизистон аз тариқи қаламрави вилояти Суғди Тоҷикистон аз сар гирифта хоҳад шуд.
Ин масири кӯтоҳ имкон медиҳад, ки мусофирон аз шаҳри Тошканд бо убур аз Хуҷанди Тоҷикистон ба маркази вилояти Ӯш дар ҷануби Қирғизистон сафар намоянд.
Узбекистон аз моҳи майи соли 2020 бо далели густариши Ковид -19 ҳаракати васоили нақлиёт дар масирҳои заминӣ бо Тоҷикистону Қирғизистонро муваққатан боздошта буд.
