27-уми июл вазири корҳои хориҷаи Тоҷикистон, Сироҷиддин Муҳриддин зимни нишасти матбуотии ниҳодаш аз вазъи марзи Тоҷикистон бо Афғонистон нигаронӣ намуда, гуфт: “Барои мо аз ҳама муҳим мустаҳкам кардани сарҳад бо Афғонистон аст”.
Сироҷиддин Аслов дар робита ба бозгашти марзбонони рус ба Тоҷикистон ишора карда афзуд пас аз ба дасти Толибон афтодани аксар манотиқи марзии Афғонистон бо кишварҳои узви СПАД, бо Русия гуфтушунидҳо доштанд, аммо дар барномаҳои корӣ масъалаи баргаштани марзбонони Русия барои ҳимояти марзи Тоҷикистону Афғонистон матраҳ нест.
“Ҳоло мушовирони низомии Русия дар бахши марзбонӣ дар Тоҷикистон ҳузур доранд ва кор мекунанд, аммо мавзуъи баргашти марзбонони он кишвар ба марзҳои мо матраҳ нест. Ҳарчанд ҳамкориҳои низомии мо бо Русия яке аз бахшҳои асосии равобити моро бо ин кишвар ташкил медиҳад”,-гуфт Сироҷиддин Муҳриддин.
Нерӯҳои Русия то соли 2005 марзи Тоҷикистон бо Афғонистонро муҳофизат мекарданд. Дар солҳои ахир пас аз бад шудани авзоъ дар кишвари ҳамсоя, аз ҷумла дар манотиқи шимолии он борҳо дар расонаҳои Русия барои бозгаштани марзбонони Русия ба марзи Тоҷикистон чандин матлабе нашр шуд.
Ин дар ҳолест, ки имрӯз вазири мудофиаи Чин Вэй Фэнхэ ба Душанбе омад ва дар мулоқот бо Эмомалӣ Раҳмон масъалаи марзи Тоҷикистон бо Афғонистон низ матраҳ шудааст.
Эмомалӣ Раҳмон дар гуфтугӯ бо вазири мудофиаи Чин дар бораи рушди хатарзои вазъ дар Афғонистон, аз ҷумла дар минтақаҳои ҳаммарз бо Тоҷикистон ибрози нигаронӣ карда, дар самти ҳифзи марз ва таъмини амният аз Чин кумак хостааст.
