Ҳикматулло Сайфуллозодаро дирӯз 16 июн дар зиндони шаҳри Ваҳдат ҷарроии қалб карданд. Пизишкони СИҶҶТ гуфтанд, ки амали ҷарроҳӣ се соат тӯл кашид ва бо муваффақият анҷом ёфт. Дар ин бора Радиои Озодӣ хабар дод.
Бино ба иттилои манбаъ, пизишкон ба наздикони Сайфуллозода гуфтаанд, ки аз қалби ӯ як ғадуди зиёдатиро берун кардаанд. Як масъули зиндони шаҳри Ваҳдат рӯзи 16-уми июн бо шарти зикр нашудани номаш ба Радиои Озодӣ гуфта, ки ҷарроҳии қалби Сайфуллозодаро Сафархон Латифов, сардухтури беморхонаи Раёсати иҷрои ҷазои Вазорати адлия дар Ваҳдат анҷом додааст.
Чандест пайвандони Ҳикматулло Сайфуллозода мегӯянд, ки ӯ дар зиндон ранҷур аст ва барои табобаташ малағе надоранд. Пештар Фароғат Сангинова, ҳамсари ин узви зиндонии ҲНИТ ба Озодӣ гуфта буд, ки вазъи саломатияш бад шуда дар беморхонаи зиндон бистарӣ шудааст. Инро пизишкони зиндон низ тасдиқ карда буданд.
Ҳикматулло Сайфуллозодаи 70-сола, зиндонии сиёсӣ, рӯзноманигор ва собиқ узви Раёсати Олии ҲНИТ дар доираи парвандаҳои марбут ба ҳаводиси моҳи сентябри соли 2015 аз ҷониби мақомоти кишвар боздошт ва ба 16 соли зиндон маҳкум шуд.
Мақомоти кишвар он сол 14 узви аршади ҳизбро бо иттиҳоми ҳамдастӣ бо ошӯби Абдуҳалим Назарзода (Ҳоҷӣ Ҳалим), ки Ҳукумат онро “кудато” нимида буд, баъзеро барои солҳои тулонӣ ва баъзеи дигарро ба ҳукми абад равонаи зиндон кард.
Раҳбарияти ҲНИТ иттиҳомоти ироа намудаи мақомотро нисбати ҳизб рад намуда, зиндонӣ намудани аъзоён ва террористӣ хондани ҲНИТ-ро сирф сиёсӣ медонанд.
Дар гузашта пайвандони чанде аз маҳбусон бо ирсоли номае ба Созмони ҷаҳонии беҳдошт хостори беҳбуд бахшидани вазъ дар зиндонҳои Тоҷикистон ва озодии афроди гуноҳашон “сабук” ва аз 50-сола боло шуда буданд. Мақомоти Тоҷикистон дар посух ба ин даъватҳо гуфтанд, вазъият ба андозае нест, ки наздикони маҳбусон тасвир мекунанд.
