Имрӯз 19 январ ҳунарманди театру синамои тоҷик, Ҳунарманди халқии Тоҷикистон Ҳабибулло Абдураззоқов, дар синни 83-солагӣ дунёро падруд гуфт. Дар ин бора фарзандаш Шаҳбоз Абдураззоқов дар саҳифаи фейсбукаш хабар дод.
Ҳабибулло Абдураззоқов падари коргардони шинохтаи тоҷик Барзу Абдураззоқов мебошад. Бино ба даргузашти ин ҳунарманди нотакрори тоҷик ҳайати эҷодии “Аздо тв” тасаллият ва ҳамдардии худро ба хонаводаи эшон баён медорад. Рӯҳаш шоду ёдаш гиромӣ бод!
Ҳабибулло Абдураззоқов соли 1937 дар шаҳри Кӯлоб таваллуд шудааст. Ӯ хатмкардаи риштаҳои актёрӣ ва коргардонии Донишкадаи ҳунари театрии ба номи Луначарскийи Маскав буд.
Ӯ дар баробари ҳунарманд будан низ ба фаъолиятҳои сиёсӣ ва иҷтимоӣ таваҷҷӯҳ дошт. Ӯ яке аз пештозон ва фаъолони Ҳизби демократи Тоҷикистон буд. Вале баъдтар саҳнаи сиёсатро тарк кард.
Чанд соли охир аз сабаби беморӣ дар пардаи синамо ва театр зоҳир намешуд.
