Абдулҳамид Хуросонӣ, фармондеҳи интизомии ҷонибдори Толибон дар Панҷшер мегӯяд, ки раҳбарони Толибон ба ӯ хиёнат карда ва ҳоло ӯро ба ҷонаш таҳдид кардаанд.
Ахиран наворе мансуб ба садои Абдулҳамид Хуросонӣ нашр шуда, ки ӯ мегӯяд, дар як соли гузашта масъулони Толибон ҳуқуқи ҳамроҳони ӯро надодаанд.
Гуфта мешавад, Шайх Мутиъ, фармондеҳи қулурдуи маркази Толибон аз ӯ хоста, ки тамоми таҷҳизот ва афродашро таслим кунад ва худаш дар марбутоти қулурду дар сафи низомиён хидмат кунад. Шайх Мутиъ ба Хуросонӣ ду рӯз муҳлат дода, ки ин фармонашро иҷро кунад ва дар акси ҳол таҳдид ба ҷонаш кардааст.
Вай ба ин фармон вокуниши сахт нишон дода, мегӯяд, ки “чӣ касе ҳақ дорад ва бо кудом чиз моро ахтор медиҳад? Агар ҷурми мо Панҷшерӣ будану тоҷик будан аст, бигӯед, ҳамин мулку ватан ба шумо неку муборак, торих қазовати худро мекунад.”
Хуросонӣ мепурсад, ки аз ҳама мақому мансаб дар замони ҳукумати қаблӣ гузашт ва қабул накард, вале ба сафи Толибон пайваст, вале имрӯз чаро онҳо бо ӯ чунин рафтор мекунанд.
Хуросонӣ, ки фармондеҳи Панҷшер аст, хитоб ба раҳбарони Толибон мегӯяд, “ин бароятон шармовар нест, ки дар як сол муҷоҳидини ман амалиёт карданд, низоми ҳасиби қувваҳои марказиро оварданд, вале шумо бародар дар ҳаққи мо хиёнат кардед, ки на маош барои муҷоҳидини мо додед ва на чизе дигар!”
Абдулҳамид Хуросонӣ, аз тоҷикони Панҷшери Афғонистон аст. Вай аз замони дубора сари қудрат омадани Толибон дар Афғонистон дар ин вилоят адои вазифа мекунад. Баҳсҳои тунди ӯ бо собиқ волии Панҷшер ва мавзеъгириҳояш дар қиболи нерӯҳои Ҷабҳаи муқовимати миллии Афғонистон бо раҳбарии Аҳмад Масъуд пештар зиёд расонаӣ шуда буд.
