Дар Тоҷикистон нархи бензин, газ ва сӯзишвории дизелӣ дубора гарон шуд.
Ба навиштаи расонаҳо, болоравии қимати бензин, газ ва дизел дар нуқтаҳои фурӯши сӯзишворӣ дар ҷумҳурӣ, махсусан дар вилояти Суғд мушоҳида мешавад.
Бино ба иттилои ширкатҳои сӯзишвории Суғд, ҳоло арзиши як литр бензини АИ 92 – 10,7 сомонӣ, АИ 95 – 11,2 сомонӣ, сӯзишвории дизелӣ – 10,9 сомонӣ ва гази моеъ – 6,3 сомонӣ мебошад.
Дар қиёс бо нархи як ҳафта пеш сӯзишворӣ 20-40 дирам гарон шуда, афзоиши нархҳо дар дигар манотиқи Тоҷикистон, аз ҷумла дар Душанбе ва вилояти Хатлон низ мушоҳида мешавад.
Дар пойтахт қимати бензини АИ 92 -10,8 сомонӣ,АИ 95 – 11,4 сомонӣ, сӯзишвории дизелӣ – 11 сомонӣ ва гази моеъ низ то 6,4 сомонӣ боло рафтааст.
Бояд гуфт, ки чанд рӯз пеш бензин вобаста ба навъи он аз 10,4 то 10,9 сомонӣ фурӯхта мешуд. Сӯзишвории дизелӣ 10,6 сомонӣ ва гази моеъ 6,2 сомонӣ арзиш дошт.
Намояндагони расмии ширкатҳои сӯзишворӣ то ҳол сабаби тағйири нархро шарҳ надодаанд. Аммо таҳлилгарон тағйири нархҳоро ба таҳримҳои Ғарб алайҳи Русия, пас аз ҳамла ба Украина рабт медиҳанд.
